海關搗破近年最有組織的盜版光碟集團，發現該等盜版光碟包括不少剛上畫的中外賀歲影片，盜版集團實行與電影商鬥快搶市場。其中撿獲的港產電影包括鄭中基執導的《心想事成》，黃子華及李彩華主演《嚦咕嚦咕對對碰》，西片《翻生侏羅館》、卡通片《森林反恐隊》等。
身為電影《心想事成》導演兼演員的鄭中基對打擊老翻拍爛手掌，他認為：「冚得好，冚多啲啦，套戲啱啱上咋喎，咁快有翻版，咁離譜，我哋拍戲花咗咁多人力、財力同心血，啲人老翻同偷嘢搶嘢冇分別，應該嚴懲。」
網友指深水埗仍有老翻
電影《嚦咕嚦咕對對碰》女主角李彩華昨在電話中說：「每套戲嘅台前幕後都付出努力去拍攝，但係翻版商一聲唔該就copy咗部戲，咁樣做真係好無良，而且翻版嘅質素始終冇正版咁好。我好贊成政府嚴厲打擊翻版，咁對電影界真係好有益處。」
有網友更以專家口脗分析各區的翻版竇。高登討論區的「智將兒」如數家珍地說：「𠵱家所謂碩果僅存嘅老翻店喺深水埗福仁商場，不過，黃金地庫更平。前一個星期行過旺角先達，俾位哥哥仔拉咗上隔籬樓上舖，揀咗3隻DVD，個阿叔益我賣50蚊咋。」
其實，盜版集團近年也要面對另一強勁「對手」──BT網站的「競爭」，以電影《心想事成》為例，本月13日已在大眾論壇免費下載，電影是國語配音，相信是有人由內地購得，然後放在網上「公諸同好」，引來逾千人點擊瀏覽。網友「a314139520」看完更留言：「超級好笑，我諗粵語版肯定超好笑。」完全視版權為無物。
本報記者