送靈犬，迎金豬，大年初一晚要發番個新年財，打牌、鋤大D、「射龍門」之外，兩支西甲主隊奧沙辛拿及畢爾包，睇嚟亦可以令各位橫財就手。祝各位新春大吉，嚟緊金豬年賺個盤滿砵滿！
華度
奧沙辛拿及切爾達俱要喺周中出戰歐協盃，不過奧沙辛拿嗰場作客鬥波爾多，就禮拜三開波，比禮拜四作客鬥莫斯科斯巴達嘅切爾達，多1日休息時間，兼夾路途無咁遙遠；只係出征「法蘭西」，切爾達就要走轉長途少少嘅機，去到嚴寒嘅俄羅斯比賽。
切爾達歇冬後走下坡
論近況，切爾達亦難睇好，唔理今周中喺歐協盃戰績，歇冬前後已經喺各項賽事錄得連續11場不勝，計歇冬後就6戰聯賽得1和5負！奧沙辛拿早陣子亦出現過連輸3場頹勢，但近兩場聯賽已經修復過嚟，先主場摸和巴塞隆拿0:0，繼而喺上周末作客塔拉戈納，一度落後之下最終反勝3:2，亦憑古拿及蘇爾達杜兩人嘅入波，及時結束入球荒。
深入啲睇，奧沙辛拿今季人腳其實同上季攞到第4名時，無大分別，中、前場人腳仍然充裕到爆；切爾達亦唔算變動得多，但就太過倚重由單箭頭拜安奴、中場利尼及簡奴比奧呢個合組嘅攻擊組合；防線被薩拉戈薩撬走咗件沙治奧費南廸斯後，教練華斯基斯應該係後悔到𠵱家，球隊失球持續，只要前述「鐵三角」攻擊組合有乜頭暈身熱，真係等輸嗰隻！
畢爾包主勝率可上揚
所以今周西甲聯呢個matchup，奧沙辛拿仲有主場之利㖭，約收8折單W賠率已夠吸引，唔使貪心博「讓球主客和」估佢哋贏幾多球啦！
呢期冷選，同係向西甲埋手，取畢爾包呢支主隊，佢哋今季主場勝出率有好大幅度上揚空間，而今輪佢哋迎戰對手基達菲，無錯亦係近期西甲比較有突出表現球隊，但亦因為咁，接連傳出佢哋位教頭蘇斯達，季後將轉去教更大球會嘅消息，唔係好事；何況睇基達菲今季比賽，對住強隊交到貨，但面對牌面實力較弱對手，反而唔太穩陣，驕傲將會令佢哋喺今仗嘗敗果。
投資特攻隊金句
「奧沙辛拿今季人腳其實同上季攞到第4名時，無大分別，中、前場人腳仍然充裕到爆。」