整容話題越玩越大，整容女星吳文忻和周汶錡的罵戰昨日連跳10級，更牽涉各自所屬的兩大公司陣營。隸屬殼王陳國強公司的周汶錡因不滿吳文忻在電視上指她擘大眼講大話，剛在殼王公司上任的王晶昨日揚言全線封殺蕭定一旗下藝人，兼且勁寸蕭定一搵茄喱啡借名人揚名，行為「幾唔上流」。
蕭定一新簽的整容女星吳文忻，近期因兩度向名模周汶錡辣火頭，結果辣到兩女所屬的兩間公司紮馬。吳文忻繼早前在活動中與屢傳整容的周汶錡狹路相逢，迫得對方扮蟹橫行避開後，又在無綫節目《問題娛樂圈》中公然指周汶錡擘大眼講大話。
「道義上好唔啱」
被辣㷫的周汶錡忍無可忍，由於她簽約的模特兒公司為殼王陳國強旗下漢傳媒聯營機構，故剛上任為漢傳媒執行董事兼董事總經理的王晶，昨日即為周汶錡討回公道，發炮還擊蕭定一。
王晶昨日接受本報記者電話訪問時，向蕭定一炮轟道：「以前蕭定一都係漢傳媒嘅人，我本身都識佢，但公事公辦，佢刻意傷害我哋嘅藝人，道義上好唔啱，要個茄喱啡搵個名人藉此揚名，幾唔上流。我哋覺得好反感，周汶錡係我哋旗下藝人，佢哋係對周汶錡個人針對性人身攻擊，我哋係會對涉及呢件事嘅人同公司，都保留法律權利。
「操守好有問題」
王晶續說：「而我哋公司同名下所有公司同合作機構，包括無綫收費台，都唔會同佢哋嘅公司有合作。」記者曾致電蕭定一，但至截稿前未獲回覆。
至於周汶錡昨日接受電話訪問時說：「公司都覺得佢哋接連嘅言論好影響我，操守好有問題，要做宣傳有好多手法啫，唔應該咁惡意批評人同埋搵人過橋吖。」
採訪：林妃、顏英儀
