自認假樣的吳文忻和自稱真樣的周汶錡，兩位變臉人繼上次在宣傳活動上狹路相逢後，前晚吳文忻在無綫播出的節目《問題娛樂圈》「鬥大細」環節中，公然再辣火頭，指周汶錡最叻擘大眼講大話，登時「大」到對方冇聲出，拒作回應。
無綫前晚播出遊戲節目《問題娛樂圈》，擔任嘉賓的整容女星吳文忻在「娛樂鬥大細」環節中，主持要她列出比容祖兒「大」的藝人及說出理由，她竟寫出自己與周汶錡的名字，她讀出自己的名字後說：「邊個夠膽去整容？仲要喺全香港600幾萬人面前，話畀佢聽整咗啲乜，係咪大膽先？」
「志在娛樂咋」
其後吳文忻寫出周汶錡的姓名，但將錡字錯寫為「琪」，她說：「呢個好驚呀，唔好嬲呀，唔好出律師信畀我呀，志在娛樂咋。周汶錡，乜嘢大呢？大話！唔關我事，唔係我話，我都係最近睇報紙見到啲記者朋友講佢擘大眼講大話。」至於周汶錡昨日得悉後，透過電話說：「唔幫人做宣傳，唔回應。」
其實早前吳文忻和屢惹整容傳言的周汶錡在一活動上狹路相逢，當時後者為避嫌，竟扮蟹打橫行迴避，情況勁𤓓，難怪今次吳文忻隔空宣戰，周汶錡也一如過往，避得就避。
此外，周汶錡前晚接受新城節目《新香蕉俱樂部》訪問，她與袁彩雲、衞蘭和江若琳成為該節目舉辦的「最佳女友」選舉最後四強，問周汶錡自評是否屬最佳女友時，她說：「總之一般女友做嘅嘢，我都做到啦，我嘅優點係識煮嘢、食嘢同做嘢。」
靚未必嫁得好
有指周汶錡擁有美貌也是優點之一，她說：「我又唔覺得靚女算係優點噃，生得靚唔靚，同搵唔搵到有錢男朋友及有段美滿婚姻係兩回事，唔好成日講到靚女就實要嫁有錢人，如果係咁真係靚女有罪！」
採訪、攝影：吳天慧
