飛機陳請客，到沙田馬場七樓董事廂房睇跑馬，佢啲客人之中，只有左丁山一個係標準馬迷，好在後來嚟咗一個以前鬧人唔使本，現在收斂不少嘅大聲W，乃正牌馬王，前年仲見佢差不多每場都在沙圈穿插，收埋啲貼士多到唔恨。但大聲W一坐低，睇真吓佢個相，人肥咗，面有幾両肉，成個人慈祥晒喎，如此情況持續，幾年後佢可貌似笑面佛，同幾年前個面帶兇狠惡師爺相，完全不同。
左丁山講：「W哥，看台外可以食煙。」大聲W答：「我已戒煙好耐，又戒埋賭，今日跑馬，係咁意玩吓啫！」唉吔，皈依基督之後，樣樣好正路，如脫胎換骨，宗教對個人嘅影響，幾近不可思議。唯一不變者，乃大聲W之政治意識。佢帶埋醫生L直闖曾特首競選答問大會，搞到公關Y手忙腳亂之後，大聲W與名嘴C、超人L、DJ羅等喺伊館搞一個政治棟篤笑，賣座算係滿意咁啦，聽講擦出火花嘅就係DJ羅與大聲W，名嘴羅白C講鹹濕笑話，大聲W話聽到想死喎。
大聲W對政治口號，政治笑話特別敏感，佢話：「我會做好呢份工」呢七個字，不同編排，有不同意思，例如（一）我會做呢份好工，好似飛機陳做CEO咁，好鬼爽；（二）呢份好工我會做（左按，例如有人想話做局長，向特首表達要求，但特首未應承）。兩個排列，有不同層次，我哋申請一份重要職位之時，對遴選委員會一定講到實牙實齒，「呢份工我會做好」，得償所願，得咗之後，就識得同董事會、股東講：「我會做好呢份工」，做得一兩年，就識得晒命咯，會同老友講「呢份好工我會做」。
飛機陳乃醒目到極之人，聽得出其中玄妙，立即講：「航空公司呢份工唔係好好做㗎！」這個當然，天氣啦，油價啦，營運成本啦，加埋起嚟，會令到航空公司CEO呢份工甚為辛苦！有大聲W在，唔識賽馬落注嘅香港學專家H，名嘴N，社長M，打鑼L，電影丹等一啲都唔沉悶，嘻嘻哈哈咁就一個下午了！