喺Offroad路段試車途中，大會特別安排咗一個中途站俾大家休息，隨後再繼續試車行程，又或者係試坐正式落場參加越野賽嘅RaceTouareg。我按工作人員指示，將車停好之後，就行入一個由帳幕搭成嘅休息室，初時仲以為呢度無咩裝修可言，哈！點知廠方特別將呢個地方布置得好有北非風情，甚至連侍應嘅衣着都係咁，真鬼馬。
但喺呢一刻，最令我心動嘅東西，恐怕都係放滿枱面嘅地道美食！大堆食物顏色鮮艷之餘，味道仲相當唔錯，尤其係一味燒羊肉，全場人都視之為目標，只要見到廚房一Refill，大家就即時走過去拎，話咁快就清晒一盤，厲害！
記者、攝影：鄭達基