明日已經是年三十，狗年最後一日，要為狗年作一個總結，最好就是同一家人或一大班朋友豪食一餐團年飯。唔記得訂枱點算呢？放心啦！我哋早已為大頭蝦搵定幾個好選擇，每間都仲有少量位畀你WalkIn，仲帶埋無綫賀年節目《新年豬事町》主持米雪同黃卓慧去試食㖭！
記者：梁學文
攝影：譚盈傑
Model：Hidy、Willian、Lo
道具提供：屈臣氏
新派廣東菜加創意新味道
食團年飯當然要一家大細，扶老攜幼咁去，最重要係菜式好味道，其次就是食靚景，去國金軒食團年飯就可以滿足這兩個要求。國金軒以新派廣東菜為主，即是在傳統之中加入創新元素，大廚陳師傅話：「其實我哋啲菜會保留傳統味道，不過就會加入新材料，好似今次個團年飯當中嘅鮑魚，除了用一般的煮法，亦會加入其他材料，我哋唔單只用鮑汁扣，仲會加入豆苗同菇類，令到味道會唔同啲。」講到創新，不得不提個蛋包糯米飯，平時只會食到用荷葉包嘅糯米飯，陳師傅就想出用蛋包，賣相和味道都頗特別。
飽覽維港夜景
維港的夜色屬數一數二，而國金軒就可以飽覽半個維港，到8點鐘仲可以邊食團年飯，邊欣賞幻彩詠香江激光表演，連位於添馬艦的環球嘉年華都一樣望到，望住摩天輪及七彩燈飾，人都開胃點。
腰纏萬貫（鮑魚三叠）
一層鮑魚一層菜一層白靈菇，共有3層，寓意三三不盡。鮑魚用老雞火腿先扣6個鐘，再夾豆苗和白靈菇，混合鮑魚濃、豆苗嫩、靈菇爽，兩個字講晒：「好味！」
金銀滿屋（鳳凰生炒糯米飯）
用膶腸和臘腸再加糯米生炒，糯米飯就有一種溫暖飽足的感覺，最特別是用上蛋包，賣相夠特別。
富貴長春（蓮子百合露）
用蓮子、百合、杞子和圓肉等材料做成，清甜又潤喉。師傅加入蛋白粒，令甜湯增多一重口感。
納福宴
$8,888/12位用（9道菜）
國金軒（23933933）
地址：中環國際金融中心商場2期3樓3101號
外省粵菜Crossover 大件頭夠霸氣
講到豪食，有甚麼比在古董前面食團年飯夠豪呢？在東來順的貴賓房入面，放了1幅19世紀初清朝的地繡「寺山福海二龍爭珠」圖，可以在有如此氣勢的地方食團年飯，豬年肯定夠霸氣。唔單只環境有霸氣，連菜式都一樣有，每碟菜都是落足料上陣，上菜時仲好大堆頭，大大碟至顯得夠豪有霸氣。
上海×廣東明蝦兩口感
東來順主打淮陽菜，陳國強師傅話今年的特色就是Crossover：「我哋將上海菜一類嘅外省菜混合廣東菜，好似煮蝦咁，我哋就用煮黃金蟹嘅做法，混埋廣東油泡嘅方法做出兩種口味嘅明蝦。」所以師傅話整個聚寶亁坤宴入面，頭盤百福聚福門就最吸引，因為結集了不同的中式煮法，無論味道和口感都好豐富。食過百福聚福門，會不會福滿門我就唔知，不過肯定會肚滿滿。
百福聚臨門（冷菜拼盤）
6款滬式冷菜，包括花雕醉雞、脆皮素鵝、紅燒牛塊、葱油海蜇頭、三色銀絲和金陵鹽水鴨。6款冷菜入面，以金陵鹽水鴨最特別，味道帶鹹，不過鴨肉就好嫩滑。
如意盛滿載（葱燒海參扣鵝掌）
烏參膠質重，配合鵝掌味道，再加上嫩口的豆苗，燜炸炒都食得，食過海參人人開心。
黃金堆滿屋（鴛鴦明蝦球）
1款蝦2種製法，最特別就是黃金炸蝦球，師傅加入鹹蛋黃一齊炸，炸到脆卜卜金黃色，鹹香味重。黃金蝦球就好似一個又一個黃金球，寓意黃金滿屋。
聚寶亁坤宴
$8,888/12位用（13道菜）
東來順（27332020）
地址：尖沙嘴東部麼地道69號帝苑酒店地庫2層
細心團年菜起晒骨個個啱食
18両大排翅、鮑魚、足2斤東星斑，再加另外6道菜，就是明閣的新春團年菜譜。大廚曾師傅話只是材料，都可以賣過萬，今次只售$6,888，他說：「我哋唔會將貨就價，最緊要就係客人識貨，食得出我哋係用上等嘅材料整。一年一次團年飯，最緊要食得開心！」講到整個菜單最特別的，一定是孖寶片皮雞，對！你沒聽錯，是片皮雞。今次師傅用片皮鴨的切法片雞，將整隻雞起肉拆骨，再配以火腿和合桃，大人細路都鍾意食，曾師傅話：「今次我哋特登將個雞起骨，咁樣人人都食得放心，無論老人家或小朋友，唔使怕鯁骨。」
紅燒津膽排翅
採用牙揀翅，最好就用來紅燒。師傅先將排翅浸水，再用薑汁和酒去腥味，跟着加上湯煮，然後分開一份份。紅燒排翅做法比較傳統，味道較濃郁之外，口感亦較稠身。
海參扣原隻鮑魚
鮑魚扣足8個鐘，入味又夠腍。海參就用比較厚肉的朱婆參，扣完4日之後夠晒腍滑，無牙的老人家都食得到。
孖寶片皮雞
用片皮鴨的切法將炸子雞起肉拆骨，伴以用蜜糖煨過的炸金華火腿和甜合桃，成為甜蜜孖寶。不過最驚喜的是脆卜卜藕片，唔知可唔可以淨嗌呢？
新春菜譜
$6,888/12位用（10道菜）
明閣（35523300）
地址：旺角上海街555號朗豪酒店6樓
HomeFeel團年飯LiveBand娛賓
一個家庭可能有10幾人，在屋企食團年飯，一來未必可以逼得落，二來自己煮都幾花工夫。想有屋企感覺，又想食到魚翅，位於金鐘的夜上海是不錯的選擇。顧名思義，夜上海當然食上海菜，傳統的火朣燉翅不可缺少，而且還有海參鮑魚，一家人去食可以慳到不少預備的時間，變相可以有多點跟家人相聚的時光。另外，夜上海亦特設舞台，新年的時候還有現場樂隊等表演，有得食有得睇，都不知幾開心。
全家安樂（原盅火朣花膠燉大排翅）
老雞燉翅火候夠，加上火朣（火腿），味道濃郁口感足。排翅一排排，夠豪夠排場，一家大細食就最開心。
龍精虎猛（龍井蝦仁）
龍井蝦仁用河蝦，細隻工夫多，不過就夠新鮮。別輕看蝦仁細細隻，每隻蝦味夠又彈牙。龍井茶味唔太重，輕輕帶出蝦鮮味。
年年有餘（崧子黃魚）
講到明是上海菜，年年有餘不會是蒸魚，改用崧子黃魚。崧子黃魚外皮夠脆，入口好香口，蘸些少甜酸汁，非常醒胃。
尊貴發財團年宴
$6,800/12位用（10道菜）
夜上海（29189833）
地址：金鐘太古廣場3樓332號
一定要有雞
馬生：團年飯一定會出街食，價錢無乜所謂，最緊要屋企人鍾意就得，不過我餐飯一定要有雞、魚同海鮮！
Tina：中國人梗係八卦啲，年尾會預多啲錢食番餐豪嘅團年飯，我一定會叫啲吉祥菜，而且仲會特別叫多啲餸，專登食剩啲希望來年有餘有剩！
老總：食乜都無所謂，最緊要一家人開開心心，我比較鍾意啲清淡小菜，平貴都無所謂，最緊要材料新鮮，啲餸好味，夠火候！
小肥貓：今年預咗$2,000食團年飯，年尾梗係要食餐好啦！一定要有鮑魚、魚翅、豬脷、髮菜等意頭餸！
