今日終於親身體驗到，點解細銀行唔夠大銀行競爭，所以專登同孫柏文借600字欄位，同各位分享呢次奇妙經歷。
話說噚日利世民尊貴嘅老婆大人，收到永亨銀行打嚟嘅電話，話佢個支票戶口OD咗一千幾百元，仲要「盡快」去佢哋嘅分行搞掂喎！大佬呀，我老婆大人啱啱生完仔坐緊月㗎！「盡快」去佢哋嘅分行？好貼身嘅服務啦！千祈唔好問點解世民夫人唔用網上理財搞掂，因為過去好多個月以嚟，世民夫人申請過好多次佢哋嘅網上服務，佢哋次次都甩甩漏漏，唔喺漏咗寄密碼，就喺搞錯用戶名。套用劉華嗰句︰「今時今日咁嘅服務態度……死得啦！」
而且世民夫人嘅數口，絕對拍得上溫敏妮，又點會咁唔小心呢？問吓問吓，先知道喺佢哋唔知幾時有個規矩，要客戶嗰支票戶口平均結餘唔少過5000蚊，如果唔係就要每個月罰50大元。世民夫人個戶口有17個月係零結餘，就罰咗一共850元。明碼實價嘅服務，要畀錢我心服口服。不過，佢哋點解唔係要儲埋儲埋咁多個月先至一次過扣錢呢？
唔好蝦世民讀得書少，香港邊度有個人存戶嘅支票戶口Keep住有5000蚊？自由市場裏面打開門做生意，趕客係絕對容許嘅行為，我吹你唔脹。不過，銀行再細間，都算係大企業，既然明目張膽趕客，就唔該佢哋唔好再吓吓話大行迫到佢哋冇路行。日日話細行好難生存，分明係自己趕客，又憑乜嘢怨天怨地呢？
黎老闆智英教我哋，分析公司掂唔掂，要睇埋佢哋同啲客戶嘅關係好唔好，至於永亨有幾「掂」，各位讀者自己判斷啦！