仲有兩日就踏入豬年，金管局總裁任志剛噚日詩興大發，作咗首七言絕詩，向廣大市民拜個早年，詩云：「恭賀回歸十周年，喜迎新班子管治，發展鴻圖開新局，財通滙聚創高峯」。
一早都話任總政治智慧，係官場中數一數二，好似北宋大才子蘇軾話齋：「竹外桃花三兩枝，春江水暖鴨先知，蔞高滿地蘆芽短，正是河豚欲上時」。
特首煲呔曾呢頭表態角逐連任，候任核心班子成員係乜陣容，任總未來老頂──財爺，花落誰家都冇人知，唔理係咪坊間盛傳嘅舊部「攞命陳」（陳德霖），任總已經喺首七絕度，先表明心迹。
所謂「鐵嘅衙門，流水嘅官」，總之「鍾意」自己份工，乜嘢新班子都可喜可賀㗎啦，又或者消息靈通嘅任總已經收到風，未來老頂係邊個。
新一年仲未到，任總就「塞」錢入大家個袋，各位學嘢啦。
[email protected]