陳伯：Hi！成議員，我噚日去元朗探個仔，搭咗架驚險列車，差啲以為返唔到嚟㖭啊！
成議員：你唔係咁好彩搭正架烈火西鐵，喺大欖隧道出事嗰架吖嘛！平時聽你講都係搭小巴入去元朗，好日都唔搭西鐵，一搭就中招，不過好彩睇你都冇乜大件事。
陳伯：叫做大難不死，必有後福啦！你都唔知當時個情況幾咁混亂，有大有細幾百人，仲有大肚婆即刻要入醫院㖭啊！我原本都搭開小巴，又快又平，但見貪新鮮咪搭吓西鐵，見佢話自己安全快捷，點知就出大件事，阻住我見啲孫都其次，嚇餐懵都唔知佢點賠畀我！
成議員：九鐵同地鐵成日話自己點樣先進安全，點知都係成日出事，噚日話就話係火警，但喺隧道就好易搞出人命㗎啦！
陳伯：係啊，好在香港人真係有互助精神，出事嘅時候係靠互相幫手，問極啲西鐵職員都唔知發生乜事，搞一大輪都安頓唔到我哋。
成議員：西鐵後嚟咪出嚟解釋係變壓器出事，搞到短路走火。
陳伯：成議員你唔係信佢哋講吖嘛，地鐵九鐵成日出事就搵啲好似好專業嘅人出嚟講一大餐，都唔知佢講乜，話乜嘢列車車頂嘅「絕緣油」過熱着火，咁即係乜啫？又話隧道管兩公里長，救火有困難，呢啲常識係人都知啦！之後又講變壓器漏油，所以高溫着火，講咗即係冇講，嘥氣！就算自己架車都要成日去車房驗啦，有問題就唔好載人吖嘛！
成議員：咁又係，𠵱家仲話嗰種變壓器係西鐵、東鐵及馬鐵都有，睇怕佢哋都唔會檢查得好，我哋搭地鐵九鐵都有排擔心喇！
陳伯：唉！政府都唔知攞咗我哋幾多血汗錢去補貼呢啲鐵路，起好又唔見平畀我哋搭，小市民搭唔搭都係蝕晒抵，真係火都嚟埋！
《街坊Hi你》歡迎讀者及各界社會人士分享地區事務個案，本欄將盡力向有關政府部門跟進。
聯絡電郵︰[email protected]