今日是年廿八，清潔完屋企後，不如食餐齋菜順便清吓腸胃。講起食齋，就要搵埋主持商台903節目《妹妹妹妹》的Wing同E，因為佢哋好鍾意食素，知道邊度嘅齋菜好味，今日仲帶我哋去打邊爐㖭！吓？唔通淨淥菜？佢哋不停話：「梗係要灼肥牛同淥生蝦啦！」我真係聽到一頭霧水！
記者：梁學文
攝影：伍慶泉
藥膳湯底好健康
平時去食火鍋，最怕就是湯底上面的泡，食到一半就要撈走，一來好肉酸；二來啲泡泡其實是油脂，食落肚唔太健康。不過用齋打邊爐就無問題，因為大部份材料都是蔬菜，連「肉」都是用大豆和蒟蒻做，就算食到尾，湯底依然清澈見底。陳師傅話：「我哋個湯底係藥膳，加上火鍋料本身都係素菜，清清哋，食到尾都唔會有泡，油脂少啲，食落都健康啲。」藥膳湯底有兩種，最特別的是鴛鴦雲豆花菇圓肉五指毛桃鍋，Wing一試就停唔到口，猛話：「湯底好清好甜呀！」
齋菜味道有驚喜
Wing是素食者：「其實我以前都食肉，不過3年前喺英國見到有間餐廳有隻豬仔走失咗，有個廚師揸住刀追，一捉到隻豬就手起刀落……」自始Wing就不再食肉，平時都買齋丸打邊爐，不過齋丸除外形逼真外，味道其實冇分別，所以今次試食嘅齋菜打邊爐有驚喜。而E雖然不是食素，不過屋企人都成日食，可算是半個素食者，「屋企人逢初一、十五都食齋，我最鍾意食齋丸，平時打邊爐嗰陣都會特登買嚟食。」
百寶聚盆火鍋錦盒
$89成人/$79小童
這裏的藥膳湯底味道較清淡，湯底中的鴛鴦雲豆花菇圓肉五指毛桃鍋和杞子圓肉當歸北芪鍋，一上枱就有陣陣藥材味。鴛鴦雲豆加上五指毛桃有健脾滋潤功效；而杞子配圓肉向來明目。另外，因為素肥牛本身味重，有些少火腿味，最好配清甜的五指毛桃鍋，而素蝦味道則較淡，最好配味濃的杞子鍋。
（包牛肉及生蝦各1碟，其他火鍋料任食，另叫牛及蝦，各$45碟/4人份。）
蟠龍素黃魚$58
頭大身細尾巴長，一睇就知似條魚。素黃魚用腐皮、紫菜、粉絲和甘笋做，入口爽爽哋。當然沒有魚的魚腥味，不過口感就有些少似魚肉。配上豉汁，感覺幾似食緊豉汁大鱔。
沙拉薯角魷魚$60
素魷魚其實是蒟蒻，造型非常似，連煮熟後的紋理都有。入口煙煙韌韌，雖沒有魷魚味，不過就有魷魚的口感。加上酸酸沙律汁，好醒胃。
薑汁鮮竹皇帝卷$48
皇帝菜原籍日本，菜名是春菊，味道似茼蒿，入口感覺是西洋菜。第一啖放入口會有些少菜青味，所以加咗薑汁中和。
睇路搵食
普光齋（23842833）
地址：佐敦佐敦道13號華豐大廈地下
營業時間：11am-11pm
座位：250個