情人節唔鋸扒食中餐，感覺就好似唔送玫瑰改送劍蘭，女友一定話：「唔係嘛？」講你知今年旺角花墟行程，1束玫瑰最低起錶價係$700：「儍㗎？食咗佢冇咁嬲啦！」今日就帶你食花，仲要係滿清宮廷御膳式食法，$828食完仲送你純銀鋯石耳環同一對搓到你兩個人咁樣嘅公仔，國產情人節一樣可以Sweet到暈啫！
記者：朱崇德
攝影：伍慶泉
講中國菜，一般只會諗起熱葷小炒，不過喺王子酒店旗艦餐廳──滿朝御膳，你就一個都搵唔到，因為佢哋做嘅係中菜底配西菜Presentation，就連裝修都玩摩登中國Design，講格調、情調，今日情人節絕對啱晒！
「我哋嘅食物出品有一個特色，就係全部同滿清帝皇有關，全屬御膳菜式！」所以喺度食完飯，仲送你925純銀鑲鋯石耳環1對，同自家皇帝、皇后造型公仔1對；最特別係呢對公仔，需要留低兩位「大情人」前面同側面相，2個禮拜後就會搓到似晒你哋個樣咁送番畀你；講真，擺酒結婚都未必有咁好服侍啦，真係極有紀念價值。
千言蜜語冰鎮蜜糖肴肉
話說亁隆下江南，食了一道冰鎮鹵肉甚是喜歡，回京後要御廚試做，就想出這味變革版冰鎮蜜糖肴肉，做法是以香料醃製剁碎豬肉後，再以「百花蜜」浸製2日，食用前再撒上炒香的芝麻，入口香口甘甜。
情比金堅金箔烤大蘑菇
亁隆最愛元配孝賢皇后，但皇后不幸37歲早死，每逢她的忌日都會做一道她最愛的烤素菌，所以此菜有情比金堅的含意；菜式先以蟹肉、海鮮及鹹蛋黃炒香，再釀入大蘑菇上烤至金黃上碟，食用前再撒上金箔。
連生貴子養心蓮子貴妃窩
這是以慈禧太后最喜愛以駐顏養生的牛奶作菜，方法是以牛奶加鮮榨的南、北杏汁作湯底，加以老雞、花膠、瑤柱及蓮子等滋陰食材作湯料清燉4個鐘，食前放上玫瑰花瓣添其清香，食完包你皮膚白又滑。
花舞傾情手切玫瑰鮮魚片
此菜典故出自康熙，他曾為一生中的最愛赫舍里氏辦了一圍「花之宴」，當中便有這道菜；以魚片薄切捲成玫瑰花，清蒸後撒上以松茸菌、蝦膠、蝦子、芫荽、上湯製成的鮮濃湯汁，入口清香鮮嫩，魚味突出。
佳偶天成蓮藕片南瓜炒鹿肉
順治帝排除萬難娶一見鍾情的弟婦董鄂妃；相傳董鄂妃不愛豬牛，獨嗜鹿肉鮮美，故作此菜；鹿肉厚切配「百花蜜」入味，再加香菇、藕片及燈籠椒香炒，難度是鹿肉火候控制，過火即韌。
滿清宮廷情人套餐
前菜：千言蜜語冰鎮蜜糖肴肉
湯水：連生貴子養心蓮子貴妃窩
主菜：
情比金堅金箔烤大蘑菇 或
佳偶天成蓮藕片南瓜炒鹿肉 或
花舞傾情手切玫瑰鮮魚片
甜品：相思雙憶椰汁紅豆酥餅
價錢：$828/2位（加一收費）
（送造型公仔1對及925純銀鑲鋯石耳環1對）
睇路搵食
滿朝御膳（31881212）
地址：灣仔謝斐道303號王子酒店1樓
營業時間：星期一至六12:00nn-3:00pm、6:00pm-11:30pm
星期日6:00pm-11:30pm
