過氣港姐冠軍李珊珊近年受濕疹困擾，曾經超索嘅身形變得肥腫難分。上年同錢嘉樂感情亮紅燈時，係咁俾傳媒追訪，但佢就唔多想講，近乎封口，現時佢同嘉樂仔嘅8年戀情已畫上休止符。
有報道指珊珊另結新歡，搭上23歲嘅芬蘭車神PekkaSanterlSaarinen，近日珊珊嘅性情亦大變，見到傳媒就好似驚弓之鳥咁，對傳媒提問好敏感，好似前晚佢喺銅鑼灣出席Twins同吳京主演嘅新片《雙子神偷》首映禮，記者見珊珊一下子膨脹咗成個碼，遠睇仲好似大肚㖭。
記者問珊珊最近忙乜嘢，佢已經「起槓」話：「你想問乜，不如直接啲啦！」於是記者咪問佢點解肥咗咁多咯，佢又唔願答，只係話：「我唔會答呢啲問題，鍾意點寫就點寫。」
「我都係唔答」
跟住有記者問佢係咪有咗？佢有啲發晦氣話：「唔答喇，你繼續問啦，我都係唔答。」之後問佢會唔會積極減肥同情人節點度過，佢嘅答案都係同一句：「唔答。」真係吹脹！
