堪輿學家麥玲玲近年喺娛樂圈人氣高企，除咗頻頻見報，就連無綫遊戲節目《問題娛樂圈》都見到佢出現，曝光率絕對唔會比一般藝人少。
怪責工作人員
人紅多是非呢句說話似乎應驗喺入行11年嘅麥玲玲身上，噚日有周刊就爆佢睇錯羅庚，攞住羅庚連南北位都搞錯、搵行家幫拖兼擺錯陣呢三大「罪狀」，擺明要拆麥師傅招牌。
麥玲玲噚日喺澳門接受商台電話訪問，一輪嘴澄清件事，佢話：「呢個係幾好笑嘅笑話，實情係拍嘅《人傑地靈》中間嘅一個segment（部份）係自己負責，係講個羅庚嘅，你知錄影好快，嗰日錄影完都意識到，『咦？我講咗南定北呢？』我就問同組工作人員，佢哋仲肯定係北。（其實佢嗰時講咗南）我係口快快講錯，唔識睇羅庚係冇可能。」
講到搵行家幫拖同擺錯陣，麥玲玲就話事件好荒謬，仲話：「食得鹹魚抵得渴，可能自己呢輪曝光太多啦！」