因歐聯關係，本周末好戲碼集中喺禮拜六，即係年卅晚上演。當日傳統嚟講，家家團聚食團年飯，餸菜亦離唔開幾款好意頭菜式，又咁啱幾場重頭戲碼，亦好似賀年餸菜咁好意頭，好睇又好「食」。
文：藍鑽石、法比奧
不來梅突變豆腐
團年開飯，一於先整窩清清哋嘅髮菜豆腐羮。足球賽講得「豆腐」都唔係好嘢，通常都係指「豆腐防線」。德甲雲達不來梅對漢堡，咪誤會，「豆腐」唔係指漢堡，而係不來梅！事關呢隊德甲次席球隊今期發瘟，兩連敗不特止仲要失夠6球，霎時間條防線好似「豆腐」。想煮好呢窩羮，最好係落足料後邊煮邊攪唔好停，不來梅周中踢完對阿積士場歐協盃，至怕體力不繼，想唔停都唔得。相反漢堡戰績好轉，今場可「添食」。
-發財如意（髮菜豆腐羮）-
今輪焦點大戰
雲達不來梅vs漢堡
開賽時間：香港時間周六10:30pm
直播：有線62台
車仔劏魚有一手
年年有餘，食團年飯點可以無魚？車路士主場對英冠諾域治場英足盃第5圈，級數有別，「車仔」大可當正對方係魚腩咁食。領隊摩連奴亦係嚟自沿海國家葡萄牙，「煮魚」肯定駕輕就熟。烏克蘭前鋒舒夫真高對強隊例食白果，但對弱旅都叫做有料到，上兩場盃賽對韋甘比、諾定咸森林合共射入3球，用呢把「軍刀」劏魚最啱使。諾域治周中喺第4圈重賽踢足120分鐘先砌低黑池，好打有限，今場等定上碟都得嘞。
-年年有餘（薑葱魚腩）-
今輪焦點大戰
車路士vs諾域治
開賽時間：香港時間周六11:00pm
直播：now684台
南韓鄉里慶團圓
食完幾味未飽肚，整碗糖水最啱數。話明團團圓圓，梗唔少得湯圓，大年初一凌晨曼聯對雷丁嘅「尾場」英足盃，咁啱兩隊南韓兵朴智星及薛琦鉉聚首團圓，夠晒應景。兩個南韓仔今季際遇麻麻，薛琦鉉季初踢過幾場好波，最近沉到正選都無埋，不過雷丁周不時喺盃賽用副選，令佢呢場有機會落場；「星仔」上場對查爾頓打破悶局，加埋曼聯下周中喺歐聯出師，可能留力，令佢擔正。曼聯近期出咩人都長贏，擁躉心甜，整多碗湯圓就甜上加甜。
-發財團圓（薑茶湯圓）-
今輪焦點大戰
曼聯vs雷丁
開賽時間：香港時間周日1:15am
直播：now685台
同場加餸：祖記遇弱當食生菜
跟住加一味「金銀滿財寶」，先至係千呼萬喚。等到年尾，終於有得睇祖雲達斯，頭炮係迎擊克羅托內；睇克羅托內今季作客贏得1場，照計「祖記」贏波當食生菜。呢味就材料簡單，好唔好食首先要睇獻汁，即係「老抽」尼維特、廸比亞路、「生粉」柏路、柏拿甸奴等等撈得好唔好；仲有「起鑊」時間要掌握得好，如果唔係就會好似上場作客對維琴察咁，領先兩球後攤凍晒被迫和2:2，講到尾，都係要考「大廚」（教練）廸甘斯嘅功力。
-金銀滿財寶（生菜炒桂花蚌）-
今輪焦點大戰
祖雲達斯vs克羅托內
開賽時間：
香港時間周六10:00pm
直播：有線63台
