自從8號仔賣盤單所謂「世紀deal」撻Q之後，外間幾乎一致認為，代表阿爺嘅網通，一直被認為同仲係8號仔主席嘅二少，存在深層次矛盾，所以每次有咩機會蒲頭，管理層一定俾人追問網通同李生嘅關係。
噚日情人節晨早，網通開EGM，大家都繼續趕去金鐘問吓阿春同左仔（即係張春江同左迅生），不過，大家嘅誠意並冇感動到佢哋，兩位唔知係咪趕返祖國交人過節，抑或唔識或者唔敢答呢個問題，於是以趕飛機為理由避見傳媒，由酒店直奔機場。
咁記者食檸檬唔係咩新聞，而網通嗰邊亦都「勁識做」，向在場記者大派Macy朱古力，之但係，佢哋亦唔mind話埋畀大家聽，啲朱古力係為咗應景派畀小股東，派唔晒咪益埋你哋，順便當saysorry囉！
[email protected]