大陸A股05年開始進行股權分置改革，要所有公司嘅股份全流通，至今已經做得九九十十，剩低幾個巴仙，約30間內地上市公司仲未搞掂，其中一間就係由03年開始，連續3年半蝕錢嘅南方航空。
內地《證券市場周刊》最近訪問咗南航董事會秘書蘇亮，聽佢大吐苦水，狂呻經營艱難，無多餘錢送畀A股股東做股改。
蘇秘書話，南航以廣州為基地，主要飛內陸航線，呢啲線正面對航程短、飛機起降次數多、使用率低等問題。而且廣州唔同上海、北京，已經過咗高速發展期，客流增長空間有限，加上大陸航空市場競爭激烈，冇人敢加價。照咁睇，南航好難改善經營狀況。
流傳阿媽會泵水
A股公司做股改，大都主要透過送股、送錢或認股證畀股東，南航𠵱家肯定冇錢送，母公司又揸住50.3%股權，為保持50%以上持股量，只可以送0.3%出嚟，即係10股最多送0.13股，咁肯定冇人制；就算送認股證，都會產生攤薄大股東持股量嘅問題。
換言之，南航根本冇計搞股改。難怪最近市場一直流傳，國家有意注資內地航空公司嘅消息，即係由阿媽泵水，呢個似乎係唯一幫到南航嘅方法。
雖然暫時搞唔到股改，但生意始終要做嘅。南航噚日就宣布，今年會一次過開十幾條長途航線，由廣州飛日本、印度、阿聯酋、非洲尼日利亞同安哥拉等地。
長途線雖然票價貴啲，但唔等於毛利高，仲要計載客率同夠唔夠機肚貨，都唔係咁易做。睇嚟佢哋位董事長劉紹勇都幾頭痛。
[email protected]