很多人對風水深信不疑，連虔誠教徒嘅錦鯉夫婦都「寧可信其有」，請高人龍師傅為官邸擺個靚靚風水陣，原來相信呢家嘢嘅唔止中國人，四大會計師樓之一嘅畢馬威都好信邪，搵高人睇過寫字樓風水，擺陣穩定人心。
畢馬威合夥人王尹巧儀噚日同華華食飯講起風水，話說公司同事之前輪流有病，搞到大家好唔安樂，為穩定人心，就搵人睇睇風水。風水大師話電梯大堂係病位，大家都成日經過，出出入入會容易病，因此擺設咗一對大象嚟化解。
增歸屬感留人才
唔知真係咁「靈」，抑或大家心理上安心咗，之後啲同事就冇再病。佢仲話，公司最大資產就係人才，現在市道好留人唔易，除咗銀彈政策，仲要做好多嘢去增加員工歸屬感，所以使啲錢睇風水都應該。
[email protected]