今天是情人節，正是戀人表達情意的最佳時刻，本報趁這個浪漫日子分別與數對娛樂圈地下小情侶做了個小測驗，看看他們是否心靈相通，測試結果證實最情投意合的一對是鄭嘉穎和周麗淇，男方曾在情人節自製蛋糕送給女朋友，女的竟巧合地說曾在情人節收到男朋友所送的蛋糕，簡直是不謀而合！要數最不合拍的一對，自然是已傳出分手的吳卓羲和官恩娜，兩人的性格及對情人要求可說是南轅北轍，男方實際，女的愛幻想，可說是分手有因呀！ 撰文：華倫地牢
麗淇 嘉穎
蛋糕傳情
Q1 如有情人，會送甚麼禮物？
周麗淇：當然係親手整嘅嘢，只有親手整嘅嘢能夠表達自己嘅心意。
鄭嘉穎：一係送份浪漫嘅嘢，可以係整餐飯，只要係花心思去做，好似我平時唔煮飯，但可能當日會下廚煮四餸一湯嘅住家飯，仲有我拿手嘅蒸蛋同豬扒。
Q2 最想收到情人送甚麼禮物？
周麗淇：都係對方親手整嘅嘢，只要係對方親手整，一定會加分。
鄭嘉穎：想有心思嘅禮物，唔需要昂貴，但希望對方留意我日常生活嘅細節，例如我i-pod壞咗，你買番個discman或我鍾意睇嘅DVD，呢啲咪sweet囉。
Q3 曾度過的最浪漫情人節。
周麗淇：同情人食完飯後，對方捧出一個親手整嘅蛋糕出來，即刻非常感動。
鄭嘉穎：自己親手整過一個蛋糕畀當年拍拖嘅女朋友，只係上一堂課，絕對唔貴，但絕對有誠意，收嘅人開心同有surprise。
Q4 最掃興的情人節。
周麗淇：大吉利是，暫時未遇到，相信冇人想遇到。
鄭嘉穎：冇拖拍時，人哋一雙一對，顯得自己形單隻影，冇拖拍時自己會同朋友唱卡拉OK。
Q5 夢想中的情人節怎樣度過？
周麗淇：希望去外地，無論係冰冷或炎熱地方，只要係靚景，兩個人你眼望我眼就足夠。
鄭嘉穎：希望情人節喺第二度地方過，好似過一個好冬天嘅又或熱辣辣嘅情人節。
心連心指數：五個心
（編註：最高5個心）
宗澤 杏兒
冰火相融
Q1 如有情人，會送甚麼禮物？
胡杏兒：通常送啲實用嘅，睇佢有乜嗜好，例如以前嘅男朋友鍾意法拉利，我就上網搵法拉利限量版T恤畀佢，鍾意電話就送電話，鍾意相機送相機。
黃宗澤：送佢一啲有紀念性嘅，例如限量出售嘅嘢。
Q2 最想收到情人送甚麼禮物？
胡杏兒：我鍾意有surprise，喺屋企跟住箭嘴搵禮物，原來係塊心形牛扒，或者有紮花喺電飯煲之類。
黃宗澤：我從來都唔恨收禮物，煮餐飯畀我食都OK。
Q3 曾度過的最浪漫情人節。
胡杏兒：試過有男朋友呃我話遊船河，其實佢帶我坐直升機，跟住喺半島酒店頂樓降落食lunch。
黃宗澤：最浪漫唔覺有喎，幾慘呀我！
Q4 最掃興的情人節。
胡杏兒：有年情人節食飯，諗住男朋友帶我食燭光晚餐，點知帶咗我去新光酒樓打邊爐。
黃宗澤：情人節冇情人都仲唔掃興？我𠵱家26歲，但有成21年都冇情人。
Q5 夢想中的情人節怎樣度過？
胡杏兒：肯定唔喺香港度過，最好好relax嘅，曬太陽，行吓沙灘，夜晚搵間有情調嘅餐廳食飯。
黃宗澤：唔喺香港過，好似喺冰天雪地嘅地方，異國度過就最好啦。
心連心指數：三個心
祖名 Fiona
自製甜蜜
Q1 如有情人，會送甚麼禮物？
薛凱琪：我會送親手做嘅嘢，希望男朋友諗番相識過程。
房祖名：我會親手做唔能夠用金錢買得到嘅禮物畀對方。
Q2 最想收到情人送甚麼禮物？
薛凱琪：希望收到冇狗仔隊跟嘅情人節。
房祖名：當然係由女方親手做畀我嘅嘢。
Q3 曾度過的最浪漫情人節。
薛凱琪：有一年同男朋友遊車河，買咗盒焗豬扒飯，坐喺車度share嚟食， 不過車度冇刀，又唔知飯盒放喺邊，係一個好混亂但好浪漫嘅情人節。
房祖名：未曾有過最浪漫嘅情人節，好希望將來有。
Q4 最掃興情人節。
薛凱琪：冇喎，如果冇情人，都可以同爸爸媽媽、朋友一齊過。
房祖名：自然係要一個人過啦！
Q5 夢想中的情人節。
薛凱琪：最理想係冇其他人，得我同佢。
房祖名：能夠同喜歡嘅人一齊過。
心連心指數：三個心
卓羲 Ella
性格不合
Q1 如有情人，會送甚麼禮物？
吳卓羲：我會送自己拍過嘅電視劇集影碟畀對方。
官恩娜：會送心形相簿。
Q2 想收到情人送甚麼禮物？
吳卓羲：最希望收嘅禮物，係可以無拘無束咁行沙灘。
官恩娜：希望收到一部鋼琴。
Q3 曾度過的最浪漫情人節。
吳卓羲：未入行前，同女朋友去赤柱食飯行街，雖然節目普通，但諗番轉頭覺得好珍貴。
官恩娜：入行前識嘅男朋友帶我去食心形牛排。
Q4 最掃興的情人節。
吳卓羲：有一年情人節，有個冇情人陪嘅朋友成晚做電燈膽。
官恩娜：本來計劃好同男朋友去某個地方慶祝，點知臨出門口嗌交，邊度都去唔成。
Q5：夢想中的情人節怎樣度過？
吳卓羲：去到歐美一啲冇乜中國人、冇人識得我嘅地方。
官恩娜：坐飛機去熱帶地方享受陽光海灘，嗰度啲杯碟全部都係心形，連食物都整到心形。
心連心指數：半個心
