豪門球會「鬼見愁」雲尼亞里重現江湖！意甲倒數第2球隊帕爾馬，周一炒教練比奧利後，宣布由雲尼亞里擔起球隊護級重任；不過，帕爾馬呢鋪好有可能搵錯人噃！
雲尼亞里早年執教卡利亞里成名後，就轉教過費倫天拿、車路士及華倫西亞等大球會，可惜呢位「大花筒」淨係識買人，執教成績麻麻，大都被炒收場；而佢被炒後亦好識得爭取利益，以球會未履行合約為名，喺「華倫」同「車仔」身上，屈到近千萬鎊。
雲尼亞里歎咗兩年幾失業日子後，今次出山幫帕爾馬，應該屬友誼性質，因為呢支球隊月前先被拍賣，唔慌畀得幾多錢雲尼亞里。我求大俠反而擔心佢教開大球會，大把錢使兼好多助手幫忙，依家要執教護級隊，唔知慣唔慣呢？
54歲嘅佢，最威風就係帶領意丙隊卡利亞里，3季就升上意甲；但97年至今執教多間歐洲大球會，都以失敗告終。帕爾馬亦今時唔同往日，既窮兼走晒主力，佢老哥呢次嚟到，真係祝佢好運。
不過，我求大俠都希望雲尼亞里呢次重返意球壇執教，可以發揮魔力幫助帕爾馬護級，因為帕爾馬好歹都曾經揚威歐洲賽場，如果要降班都幾可惜㗎！