晚飯時分，碰到基金經理K，自不然乘機問路數，點知基金K話近期股市波幅太大，短期難以預測，又話大凡由資金帶動嘅股市，上落快速，好難捉路嘅。據佢所知，不少內地上市公司攞到上市集資一百億、一百億之後，應人民銀行之請，唔將IPO所得匯入內地，反而將資金留在香港。咁又無理由蝕外匯㗎（因人民幣升值，港元貶值），一個最易賺錢嘅方法就係買入以人民幣生意為主嘅國企股份（例如中移動、中人壽），故此佢哋大力入市買入呢類股份，國企股好難跌。
人民銀行因為內地外匯儲備太多，早已突破一萬億美元，唔想儲備急速上升，招美國、歐盟所忌，逼人民幣加快升值，故此勸阻H股上市收入匯返內地，卻因此產生副作用，令香港市面資金極度充裕，猛炒國企。基金K話拜神保祐內地A股唔好崩圍，美國股市唔好急跌，否則香港恒指、國指跌埋一份嘅話，唔少內地公司嘅香港股票投資會受到打擊，消息一公佈之後，又會繼續推低國企指數。
原來國企有此隱憂，是故股市快上快落，有乜風吹草動，一個早上可以推跌恒指近四百點。睇見冇事發生，下午竟又可以將恒指推上高位，膽小散戶一定嚇死。基金K話我哋要睇緊啲同業拆息與港幣兌美元匯率。目前各銀行拼命搶按揭貸款，淨利息收入大概係五十點子（0.5%），做銀團貸款，淨利息收入只會係三十點子左右，根本冇賺頭，但係因為美元利率高，港元利息低，沽港紙買美金嘅話，銀行嘅套息活動可以賺到一百點子以上，故此銀行紛紛套息，導致港元下跌，跌到七點八一，基金K睇會繼續跌到七點八五，啲銀行先至會收手。但假如資金流走，港元同業拆息上升嘅話，港元美元套息活動就會無利可圖，港元匯價會回升。基金K講完一大輪，都冇話好唔好入市，左丁山問佢即係點呀？基金K話中央一定唔想A股狂升急升，但係希望長期上升，短線投機好易墮入陷阱。