銀行競爭激烈，客戶雖然大過天，但有時都幾難頂。華華噚日食飯見到喺滙豐專睇按揭嘅靚女主管施穎茵（DianaCesar），席間講起𠵱家做銀行前線銷售嘅辛酸，Diana憶述佢喺舊年年初坐上𠵱家個位時，曾經收過一個客戶投訴電話，呢位連睇戲都會喊嘅靚女，竟然俾個客鬧足個半鐘都冇冚線，頭45分鐘仲要附帶唔少粗口㖭！
起初個客其實係打去客戶服務中心，幾經轉折下，唔知點解駁到去Diana嘅直線，咁啱秘書並冇擋駕，於是佢就被迫聽咗個電話，個客嘅投訴包括不滿服務收費、私人貸款嘅利率等等，查實呢兩瓣都同Diana冇關，佢只負責睇存款、按揭等，但佢理解客戶需要渠道宣洩不滿嘅感受，於是就無辜做咗人哋嘅出氣袋。
客戶送花𠱁佳人
唔知個客係咪覺得內疚，事後搵番Diana，話要請佢食番餐補數，伊人梗係婉拒啦，最後個客都叫人送咗紮花嚟，希望Diana順番條氣。
唔講唔知，原來Diana係標準戲迷，經常留意城中上映嘅電影，仲已經打算農曆新年要去睇《莎樂的神奇網網》。平時我哋甚少見佢戴眼鏡，噚日見佢戴住，好奇一問之下，先知佢前晚翻睇又翻睇「youjump,Ijump」嘅《鐵達尼號》，由於「交足戲」嘅緣故，因此搞到眼腫腫。如果嗰位貴客知道Diana嘅嗜好，會唔會改贈戲飛補數呢？[email protected]