某國際機構調查加薪幅度，以實質薪酬（扣除通脹）計算，香港今年平均增加1.5%。加上通脹2%至3%之後，名義工資大概係加3.5%至4.5%。調查結果就係咁嘞，閣下人工今年是否有此升幅或者更多，未必一定㗎，有幸有不幸啦，睇你做邊行。
會計C住在一個豪宅級屋苑，目前呎價在一萬元或以上，最便宜嘅單位都值成一千萬元。會計C不久前聽到一個朝見口晚見面嘅大廈看更猛咁呻，話月薪只得四千，工作十二小時。會計C知道呢位看更每日返足工，幾勤力，對大廈住客好有禮貌。適逢有機會見到屋苑發展商嘅董事，於是為民請命，對董事講：「你哋間物業管理公司做得好好，屋苑內外亁淨、安全舒適，咁就冇謂刻薄看更啦，將佢哋嘅人工加到五千蚊，唔算太過呀嗎？」董事回答：「唔該你問吓你哋嘅業主委員會先，委員會睇盤數睇到實，經常批評我哋嘅管理公司使錢使得太多，看更薪水一定要跟足市場水平，唔可以任意調整，所以咪四千蚊一個月囉，市場價格係咁，你叫我哋點辦？」
會計C無言以對，一來佢冇參加業主委員會，從不睇管理公司盤數，二來佢亦係市場主義信徒，佢間會計師樓加薪畀夥計就加好多，因為會計人才供不應求，公司夥計成日俾人搶吖嘛！看更業之市場又如何呢？純睇薪資，肯定係供過於求，係買家市場啦，唔怪得香港物業管理公司協會會長孫國林（自由黨）對曾特首講，即使訂立最低工資，都未必有效。
最近睇報紙，知道非洲國家津巴布韋（Zimbabwe）三個星期前向所有公務員加薪300%，但係教師仍然按章工作，點解咁奇？睇真啲，津巴布韋總統莫加比（Mugabe）（82歲）統治國家二十七年後，將國家搞到有咁壞得咁壞，民不聊生，現在嘅通脹率高達1280%（一月份通脹率），首都警察威脅話要參加騷動！該國央行行長居然喺電台向全國演講，宣佈「通脹非法」，任何人在三月一日至六月三十日加薪或加價，會被拘捕。但央行行長講講吓，電廠停電，廣播中止！睇吓津巴布韋，香港人加薪1.5%，有安樂茶飯食，算唔錯咯。