《唐山大兄》的李三腳雙截棍，再加《幪面超人》的鐵臂銅拳風雷電，70年代初的鄭錦昌，簡直天下無敵。鄭錦昌因仰慕李小龍而寫了一曲《唐山大兄》來讚美對方，結果不但紅遍東南亞，而且更贏得李小龍珍貴友情，二人首次見面，李小龍已一副老朋友姿態叫鄭錦昌打他腹肌，又要求鄭錦昌送他唱片留念，可惜當年《唐山大兄》原裝正版唱片封面沒有李小龍照片，鄭錦昌惟有硬着頭皮買了幾張印有對方劇照的老翻碟送給李小龍收藏留念。 採訪：戴彩煥
現年64歲的「粵曲王子」鄭錦昌，為馬來西亞土生土長歌手，籍貫潮洲，60年代在友人介紹下開始灌錄唱片，憑《願化惜花蜂》和《幾度夕陽紅》等廣東歌走紅，其中72年推出的《唐山大兄》，更紅遍東南亞，是鄭錦昌黃金時代力作，幾乎所有有華人的地方，也懂得唱《唐山大兄》，而他主唱的《十一哥》、《新禪院鐘聲》和日本片集《幪面超人》同名主題曲等，當年亦名噪一時。不過，《唐山大兄》一曲其實並非李小龍主演的同名電影主題曲，而是鄭錦昌為讚美李小龍而寫。
鼻尖感受腳風厲害
鄭錦昌日前接受訪問時說：「當年睇完《唐山大兄》部戲，覺得李小龍啲功夫好厲害，於是我就照住劇情寫咗呢首歌嚟讚美佢。有次李小龍上《歡樂今宵》，咁啱聽到《唐山大兄》首歌，佢好鍾意，即刻搵人約我去半島酒店飲茶，但我因為做嘢去唔到。直至一個月後，我哋先至喺以前無綫廣播道總台嘅木人巷碰面。佢好friendly，一見面又握手又攬，跟住佢重同我講：『錦昌哥，試吓打我個肚，大力啲！』第一次見面，就好似識咗好耐嘅朋友咁。」
鄭錦昌續說：「咁難得見到大明星，梗係同佢影番張相先，嗰日我部相機冇閃燈，於是問現場一個記者借閃燈用，後來個記者攞番閃燈之後，諗住同我哋影張相交差，點知李小龍好惡咁話：『唔俾影！』仲用佢原本格肋底夾住個手提包遮住自己個樣，佢就係咁真性情㗎啦！佢試過喺我面前表演功夫，踢我一腳，雖然冇掂到我，但感覺到佢隻腳喺我鼻尖掠過，佢啲腳風真係好利害。後來佢又叫我送唱片畀佢，但我醒起《唐山大兄》隻碟原裝正版封面係冇佢張相，但翻版碟有，所以我就送咗幾張翻版碟畀佢，諗番起真係好好笑！」
瞞TVB唱《幪面超人》
《唐山大兄》觸發了一段珍貴友情，而《幪面超人》一曲，背後原來亦隱藏了一件不為人知的往事。鄭錦昌說：「當年我簽咗畀TVB做合約歌星，但麗的（亞視前身）好想我幫佢哋唱日本片集《幪面超人》中文版主題曲，於是諗到條橋，就係我照幫佢哋唱，但唔出我個名，TVB聽到首歌都有追問，我咪猛話唱嗰個唔係我囉！我唔認，佢哋都冇法子㗎！」
攝影：仇志德
本欄逢周二刊出
