孫柏文喺《金手指》一欄裏面曾經狠批過有「股壇長毛」之稱嘅DavidWebb。原因係佢一邊廂為咗打破某些公司嘅壟斷，舉腳支持將會非常煩擾香港市民嘅「計劃競爭法」，另一邊廂就理直氣壯咁支持港交所繼續壟斷，所以令我覺得佢為咗升職加薪做港交所董事，可以連真男人一定要有嘅原則都放棄。
不過，我今日一定要同大家講，孫柏文挺Webb！無他嘅，因為DavidWebb同我都非常痛恨「強迫金」。而喺啱啱過咗嘅周末，Webb兄就赤裸裸地用計數機篤爆「強迫金」──呢個政府強迫市民，將自己辛辛苦苦賺取嘅血汗錢，利益輸送畀基金公司嘅騙局。可能，特首曾蔭權話要將香港變成金融基地嘅計劃經濟，就係建基於呢種「強制性補貼輸送金」。
孫柏文今日作兩個承諾。第一，如果下一屆立法會選舉當中，喺我選區有候選人話：「一日強積金係強制性嘅，一日都會喺財政預算案投反對票！永不妥協！」就算冇其他政綱，我都一定投佢一票，仲要自告奮勇幫佢「洗樓」、派傳單。
第二個承諾就係，如果Webb兄搞遊行抗議「強迫金」，孫柏文第一個到，仲會肩並肩咁同Webb兄行。「《金手指》方案」就係，立即畀市民停止供款嘅選擇，同畀市民即時提取已經供咗嘅款項選擇。就係呢兩樣嘢咁簡單！
金手指網誌： http://phatdat.blogspot.com