散戶為股市瘋狂，有股民擔心呢個係大跌市前先兆，Jasonwong9898喺《香港討論區》話：「以46倍PE上市的滙源果汁（1886），傳聞超購1000倍，有當年北控（392）及TOM（2383）的感覺，資金又開始外流，我怕今年冬天好多人會黑口黑面，都係留番啲錢過寒冬好啲。」
呢個話題食正時勢，立即吸引各方網友相繼發表意見，大多數都贊同Jasonwong9898嘅睇法，貝克話：「個人上個月已全面撤退，離場觀望。」
alex@~@則指：「𠵱家只持有小量貨，全部都係賺返嚟嘅，用嚟過日辰，等返到合理水平再入市。」
垃圾股都升得人驚
網友alexero仲話：「見到近日連三、四線股都大升，再加埋啲鹹魚翻生股，好似新世界數碼（276）話喺蒙古買煤礦都有幾億成交，真係不祥之兆！」
eric_chau都搭嘴話：「真係不妙，個多月來20大升幅都係垃圾股、仙股，一日最少都升20%，唔驚至奇。唉！業績期應該死硬！」
睇嚟唔少網友對後市都持保留態度，怕大跌市就快殺埋身，不過fundmanager就講笑咁話：「8號仔PCCW都仲未俾人炒起……𠵱家個市仲OK，不過離跌市不遠矣！」
港股會唔會出現大調整就未知，網友們的憂慮亦不無道理，現市況下炒股都係小心為上，johntt就建議：「淡市就話揸多啲股票、少啲現金啫；家陣市旺兼風高浪急，都係多啲現金、少啲股票。」
