早前提過有網上跌錢黨冒賓架之名，喺網上招搖撞騙，恒生二佬、常務董事兼副行政總裁潘仲賢Joseph亦俾人擺上枱。噚日佢出席恒生首年贊助嘅社會企業家計劃（圖），佢話自己冇收過冒佢名嘅電郵，但好多朋友轉寄畀佢睇，不過呢啲詐騙電郵大家唔會輕信，佢哋已即時回覆來電郵嘅一方澄清冇咁嘅事，又向警方備案。不過咁樣出咗名唔知係唔係好事嘞。
講番個活動，恒生至今已召集二十名員工做義工導師，帶班中學生做環保企業計劃書，Joseph上年有份做評判，話參加計劃嘅同學建議書做得好好，令佢印象深刻，佢慨歎中學生已經諗點樣管理財富，佢自己呢，好遲先識，喺大學讀到財經相關學科時（佢以前喺西澳洲大學讀商學學士學位）至有投資概念，而佢第一項投資就係買樓，嗰時入咗銀行做，見員工有按揭優惠，又準備成家立室，要老婆仔亦要有樓先得，所以用90幾萬買咗層樓喇。
[email protected]
梁鑑章攝