居屋揀樓雖然要等到3月，但各家銀行已經推出預先登記，各出奇謀，希望搶佔客人嘅心，暫時睇嚟最有噱頭嘅係渣打，佢哋話會向成功提取居屋按揭貸款、參加「楊師傅睇風水」大抽獎嘅首10位幸運兒，免費提供楊天命師傅睇風水嘅服務，喺2月底前預先登記按揭服務，亦會獲贈100元現金購物券。
星展銀行就話，3月15號前登記居屋按揭，將獲贈精美禮品，即時申請貸款亦會獲贈100元百佳現金券。
不過，上述優惠都係噱頭多於實際，分分鐘羊毛出自羊身上；揀按揭始終要睇實際息率，暫時嚟講最正都係街坊銀行創興，借款額80萬元以上，息率可低至全期P減3.05%，現金回贈為0.8%。
[email protected]