雖說經濟好轉，但作為一個負責的師奶，份內事是精打細算，慳得就慳。挨年近晚，一班師奶網民齊齊討論「慳家大法」，希望可以交流學習，互補長短，但其中有個超級慳家網民的經驗，簡直令人難以置信！
「買日用品要去藥房，不要去超級市場。」這些消費心得固然實用，但相對網民召藥師只是小巫見大巫，她說：「我會用水桶24小時慢慢載住滴出嚟嘅自來水，用嚟洗衫、洗菜，水費每季唔會多過30蚊。」除水費外，基本上在衣食住行，召藥師都有其慳錢絕招，例如自己整生日蛋糕，一家四口理髮皆由她操刀，總之凡事不假外求，自然慳得更多。
召藥師慳家有法又不失禮，成為一眾師奶網民偶像，但網民晴B媽對其「慳精」母親的行為卻非常頭痛，「我阿媽慳到我無法忍受，佢一啲都唔窮，有積蓄，仔女有畀家用，但係佢就搞到自己好似乞兒咁。」
據晴B媽講，其母不單會向親戚朋友收集二手貨，還會四處執紙皮和汽水罐賺錢，去街市又會貪便宜買爛菜，而且外出永遠搭「11號車」，安步當車。「有病又唔睇醫生，人哋唔知仲以為仔女刻薄佢，其實佢係銀行大額存戶。」節儉固然是一種美德，但過猶不及，還是網民chrisunkub的建議最實際，「唔胡亂買嘢咪等於慳咗錢囉！」