要講娛樂圈騎呢藝人，黃夏蕙都算數一數二，佢先後有「娛樂圈攝石人」同「殯儀之星」之稱，試過去黃大仙上頭炷香俾人迫甩個假髮，又試過萬聖節扮鬼巡遊蘭桂坊，佢啲搞笑嘢真係有排數。
邀舊情人上船
靜咗一排，夏蕙姨前晚又有新搞作。為慶祝豬年來臨，前晚佢喺尖沙嘴搞咗個郵輪宣傳活動，夏蕙姨話佢最近獲該郵輪老闆賞識，搵佢擔任經理一職，所以前晚就請咗一班圈中好友包括舊情人林蛟、雪梨同陳勉良等一齊上郵輪玩，而粵劇伶人黃金棠就扮財神搞氣氛。
有財神駕到提早迎新歲，又點少得今年嘅主角——豬呢？前晚夏蕙姨就犧牲色相，扮成一隻白豬，佢着上一身白色衫，將塊面搽到白濛濛，加上一條金豬鏈同豬樣面具，形神俱似，搞笑非常！
夏蕙姨話佢成世人都未正正式式打過工，今次做郵輪經理係佢第一次打工喎！提到新年願望，夏蕙姨話「老公」胡百全病咗兩年，佢嘅屋企人出禁制令唔畀佢去探病，所以夏蕙姨希望今年可以同佢團聚喎，至於蛟叔就話自己都上過嗰艘郵輪幾次玩，幾次都有斬獲，睇嚟賭運唔錯噃。
