歐洲足協盃32強首回合，早唔踢遲唔踢，係要喺情人節期間開波！依小弟觀察唔同民族對情人節嘅重視程度及「出事指數」嘅經驗推測，歐洲球員實「玩」到腳軟，仲有力射波？
每逢有大型比賽，生理學家及醫生實會分成兩派，一派支持禁慾；另一派係反對禁慾。前者有教練撐腰，後者我估有朗拿度帶頭！當然，禁慾同球員嘅表現有冇關係，𠵱家都仲未有定案。不過，可以肯定嘅係出嚟玩，飲多兩杯，興奮過度搞到失眠，最後唔夠休息，落到場實出事啦！心水清嘅球迷，投資前要三思！
講番場波，雲達不來梅對阿積士，前者德國，後者來自荷蘭，兩個國家出名乜？唔使我講啦！「飲完食完」頭暈暈上場，實出事！當然，以上純粹靠估！以波論波，我會睇高主隊，因我鍾意雲達一對攻擊拍檔高路斯同廸亞高。小弟之前提過，曾經有一個調查訪問多名歐洲一級教練，佢哋異口同聲都話廸亞高打中間，助攻又助守，係一個好好用嘅球員！歐洲賽，主場球隊點都睇高少少！
周鵬
商業1台《球迷集中贏》主持
電郵：[email protected]