前日睇國際米蘭作客基爾禾場意甲，個場全「吉」確係冇乜氣氛，好彩國米着住件印有贊助商「倍耐力」中文字嘅波衫，令我求大俠睇波有份親切感。據講，國米近兩季總共着呢件中文戰衣3次，3次都贏。喂，咁老嚟，不如以後着多啲啦。
唔係講笑，上季國米聯賽主場對利禾奴、拉素都係着呢件中文戰衣，果然「倍耐力」，分別大炒5:0同埋3:1。據國米中文官方網講，國米前日特登再着中文戰衣，提早為華人賀新歲喎，結果一開波就由阿祖安奴「爆」贏敵衞後窄位射入靚波，加埋基斯普埋齋輕鬆贏2:0。
下場迎卡利亞里穩勝
贏埋呢場之後，國米聯賽累積15連勝，平咗之前由皇家馬德里、拜仁慕尼黑共同擁有嘅歐洲聯賽連勝紀錄；國米下場迎擊離開南部幾乎唔識踢波嘅卡利亞里，刷新紀錄應該冇走雞。睇見「阿祖」回勇、助攻王史坦高域、費高嘅供應源源不絕，加埋個個後衞都識入波，唔怪得國米嘅奪標賠率企硬1.002倍，足智彩5大聯賽之中，就只有法甲里昂同佢哋一樣咁熱。