新股熱潮再臨，阜豐集團（546）周五掛牌漲38%，而上周3隻新股包括滙源果汁（1886）、中國地產（1838）以及鴻隆控股（1383），招股期相撞，令有意用孖展重鎚出擊的散戶只能「三選一」。
不過，在《香港討論區》上，網友似乎只對滙源情有獨鍾，雖然預測市盈率高達26至32倍，但網友mousefish指，滙源可成為錦江酒店（2006）翻版，屬內地龍頭股兼食正內需概念，「錢」途無限。
有望成錦江翻版
錦江招股時預測市盈率近30倍，現時已超過60倍。近期滙源影子股，安德利果汁（8259）及海升果汁（359）越升越勁，今年以來兩股累升23%及41%，今年預測市盈率，分別為20倍及17倍。
由於滙源將於年初六（23日）掛牌，網友KKLEUNG話，滙源入場費只係三千零蚊，升夠一倍嘅話，可以封自己一封大利是。
身處內地的網友Orangejuice直擊報道，話北京超市裏面，只有滙源屬本地上架果汁飲品，其他嗰啲好似海升咁，就連影都唔見；坐內地客機，亦可以飲到滙源果汁，在品牌效應下，就算貴都要抽。
一名美資基金經理指出，滙源在內地市佔率極高，但中國人均果汁飲料消費量仍很低，加上廣大農村市場尚未開拓，為該公司提供很大發展機會，因此滙源屬於相當優質嘅內需消費概念股。
食正內需概念潮
不過，亦有網友認為抽唔過，ha555ha話滙源果汁唔算好飲。vvwetwet亦話滙源雖然請咗「野蠻女友」全智賢做代言人，但包裝太過老土；而且橙汁、蘋果汁味道略淡，同「果汁先生」無得fight。