華華估計，中國女首富──玖龍紙業主席張茵今個禮拜應該好忙。點解？因為佢就係喺50年前嘅今日出世，今日係佢嘅新曆生日，以佢同老公嘅恩愛程度，斷估都會慶祝吓。慶祝完生日，聽日玖龍就公布業績，到禮拜三就係情人節，咁你話佢係咪有排忙？
華華雖然八唔到張茵會點樣慶祝生日，又或者會唔會因為太忙而唔搞，但相信佢𠵱家嘅心情一定唔會差得去邊，原因係佢嘅寶貝玖龍嘅中期成績表，好多分析員都非常睇好，搞到個股價嘭嘭聲咁飆上，市值亦係咁爆上，淨係呢份生日禮物已夠開心啦！
聽講話，玖龍會喺情人節搞分析員會議，為業績解畫。華華就建議，不如順便做埋業績後路演，乘機再嚟一次度蜜月，都咪話唔開心。點都好啦，華華喺度補祝一句：「紙品女王生日快樂！」