我左擁RafSimons，右抱MartinMargiela，上身試着whereabout的T恤，下身穿起Viktor&Rolf的褲子，腳下還有雙Visvim的新鞋……然後無意識地看看手錶，已經是晚上10:04──所有腕錶廣告時分針標準陳列角度──啊！突然想起來了，剛剛在銅鑼灣吃過晚飯，見時候還不太晚，心血來潮又想shopping，於是跑過來SinoPlaza逛I.T的──買衫買到十點一，而且還是這些一等一的牌子，世界上還有甚麼地方可以發生這種事情呢？
幸好那時沒有申請居英權，綠卡大抽獎也落空了，亦沒有足夠的身家投資移民加澳星，否則現在也許呻笨，七點後無衫可買的城市怎可能是我的樂土呢？努力工作還有意義嗎？朋友忙又失戀的那段日子如何熬得過去？
7大奇景
讚花香純粹出於公義，我甚至不是賣花的，我甚至只是個刁蠻任性、以為自己「永遠是對的」的顧客，但世上「人云亦云」實在太多，正如人哋話以前啲廣東歌好聽啲你又信，人哋話但凡有「中國」兩個字的股票一定升你又跟，人哋話去外國買衫款多價錢又平你又……今次真係唔好再執人口水尾，傳到真嘅一樣咯。
是有抗衡聲音的，例如我。
在香港買衫，好處不只開得夜。
1.價錢OK：在香港買世界名牌並不特別平，但也不很貴，與原產地的差價比起十年前已大幅拉近，因為有水貨舖的競爭，而且人人常出埠，開天索價已經無得做，所以代理商都不敢無端端貴一截，最重要的是大部份本地時裝店或明或暗都有折（就算你沒有，你總有一個朋友有的），埋單水位和歐洲日本又再近一點，當然你會說「在那邊買也有de-tax呀！」但就我所見所知，面對EU任何一個機場那些永遠將你當賊扮的海關人員，蓋個印退個稅你以為很簡單，卻從未是個愉快經驗。
2.免抬：抽着七個shoppingbags行成日街，就算啲衫免費，仍然是辛苦，回程時上車落車，那些大篋巨袋有時自己也難免要出手抬一點，況且在機場checkin時overload的話，你以為那些過磅費是誰付的？怎似得香港名店時時肯送貨到府上，就算沒有這服務的，畢竟是自己hometown，陶侃運磚一天一點，膊頭都不至於操勞過度，即日脫骱。
3.有得試有得改：當然試過隔山買牛郵購靚衫，但大師出「碼」，有時很飄忽，你以為自己46，點知今季剪裁偏細，52才勉強着得落，結果領嘢，在香港入貨，至少可以自備身體，試啱先買，不幸體形與設計有所出入，也能改，喺第度買都有alternations，但你等得起嗎？香港的改衫師傅，堪稱鬼剪神工，舉個例，中環Joyce的駐場大師，由OscardelaRenta至RickOwens都識改，真係去邊度搵？
4.殺價狠：時裝名店們表面上一定不鼓勵我這樣說，但在香港的所謂「季尾」買衫，減價時間之長，殺價幅度之狠，世界上你要是找到另一個比得上的地方，來拆我招牌吧！
全球各大時裝消費城市，只得香港的「大減價」無愧於那個「大」字。
5.齊：死未？齊㖭！如日方中的新發彩，自然巨細無遺一來二十架任君選購，連稍稍在偏僻時裝雜誌角落頭出現過的新牌子，在你記得熟它的發音與串法之前，回頭已發現它們差不多整個系列，已齊集皇后大道中或者百德新街了，「我一定會做好呢份工」這句口號，應該讓給香港時裝店買手，觸覺好，勇氣夠，當然還有進步的空間，但肯入咁多牌子，每個牌子又肯入這麼多不同類型的貨品，也真算實現了「百貨中百客」的購物烏托邦，OK，當然還有第一百零一、一百零二種客，但以香港這麼一個地方細人口少的城市來說，能做到這個地步，在時裝零售上，已是超歐趕日，再嫌就是挑剔了。
6.唔使撲：中環、金鐘、銅鑼灣、尖沙嘴、旺角，頂多加一個近年《Milk》雜誌老闆TK氏努力開發的柴灣，yourshoppingtripisdone！不用環頭環尾頻頻撲撲，坐車難截行路嫌遠，更不必像遠征巴黎東京紐約──上天將你要逛的shops撒鹽式灑在地圖的每一個角落，東一執西一執，似間十年沒人收拾的單身男子公寓，想執死人咩？
7.開得夜：我知這個我數了，忍不住還是要再數，Joyce、I.T、D-mop、連卡佛、HarveyNichols、Shine、SistyrMoon、MariaLuisa暨各大名牌專門店，當中最有原則的也開到晚上七點半，其餘的有八點，有九點，有十點，就算九點五十五分入門口，逛到十點三未試完，其實也不會絕情到趕你走，這種對衫癡的體貼，只得香港有，所以每次買衫買到「三更半夜」，想起那些逢星期日休息的時裝之都，每次都是真心感激。
抵我同你買咗咁多無着過嘅衫！
Textby黃偉文
黃偉文自我簡介
填詞人，其實最鍾意買嘢，最憎寫字，星期日盡可能唔寫字，去買嘢。
