兄弟如手足，呢句話響幼稚園已經有教，但隨着時代越進步，社會越富貴，呢句說話似乎已經放咗入博物館。響上流社會，兄弟口和心不和，為伯爺副身家爭崩頭大有人在，尤其後生嘅富豪第二代，明爭暗鬥，花盡心思爭寵，令人覺得做平凡人可能仲幸福啲！
老牌華資家族兩個太子爺都算生性，正正經經讀完書返嚟，循規蹈矩冇令老竇擔心同出醜，兩兄弟人前亦算融洽，於是做老竇嘅，繼續按自己嘅如意算盤，分政商兩路培育佢哋，大仔喺家族生意幫手，細仔從政界出發，一直以嚟相安無事，直至大仔婚變失寵，兄弟關係亦開始生變！
怨氣轉移 關係變差
根據上流社會八卦一族講，大仔個老婆「嫌棄」佢而要求下堂，唔係因為佢唔夠靚仔，而係佢太爛玩爛蒲，做咗老竇都仲係咁，加埋為人純真，幾十歲人仲鍾意埋啲青春歌唱組合。
老竇自己雖然風流，但都唔like大仔婚變，於是慢慢轉移押注響較乖嘅細仔身上，所以大仔響失婚又失分嘅雙重打擊下，咪將怨氣轉移到細佬身上！
話說有次同兩兄弟都friend嘅某公子，同細佬傾project，到某個stage需要大佬個部門支援，於是咪出聲囉，點知個答案令佢幾意外，大佬話個project嘅嘢搵細佬傾啦，佢係唔會掂嘅。「呢個project真係有得賺噃！？」「Sorry，你都係搵細佬啦！」結果呢，人哋就搵咗另一間公司合作，仲搞得唔錯！鬥氣鬥到搵屋企生意嚟「較飛」，佢老竇唔知點睇呢？
[email protected]