有一位歌星跟我說，最怕與陳奕迅（Eason）唱K，因為他拿着咪就忘形，任何人點了甚麼歌，當音樂響起，他就會拿着咪說：「呢隻歌我識唱，我嚟！」他可以忘我地獨唱兩個小時，終於有人忍不住跟Eason說：「喂！好囉喎！俾我唱番首都得啩！」這時他才肯放下咪歇歇！Eason真是一個歌癡，除了唱歌，其他一切的事情，其實最好不要煩他，所以以前他的一切都是由父親或太太去管理，但人總會長大，總有一日會想由自己當家作主，踏進07年，Eason好像突然醒覺了！ 撰文：陳月媚
「淨係聽自己講」
這大半年來，不斷有傳聞指Eason與經理人陳家瑛不和，年底約滿後雙方不再合作，同時又傳Eason會加盟李澤楷旗下大國文化公司。
「老實講，我係一個唔識管理自己事業嘅人，對理財更加係一竅不通，所以我係需要有一位經理人去幫我處理呢啲問題，而陳家瑛的確可以幫到我解決呢啲問題，基本上佢連我嘅情緒都會照顧埋，所以我唔明點解會出現呢啲傳聞！我同佢嘅合作係愉快嘅！」
冇時間陪女兒內疚
在Eason離開英皇公司前，他一直對父親言聽計從，他的事業可說是全由父親去管理，兩父子曾為工作出現爭拗，但簽約陳家瑛後，陳父開始淡出，但有指其妻徐濠縈對他的工作也會出謀獻策，但人長大後，總會有自己當家作主的一日。
「以前我成日都係聽人哋講，一時係聽爹哋講、一時聽老婆講，但𠵱家我淨係想聽番自己講，咁做係想考驗吓自己。其實老婆照顧個女已經好唔得閒，唔想去兼顧咁多嘢啦！其實我工作咁忙，平時都唔係有好多時間可以陪個女去玩，我真係有啲內疚。」
對於有傳聞指Eason因為早前要應付父親的律師費，頓時令經濟負擔大增，所以今年要努力搵錢。
「其實我嘅經濟負擔不嬲都係咁上下，又冇話因為爹哋啲律師費，令到我增加咗好多開支，不過人係要做嘢嘅，並唔係話因為要搵錢，就要迫自己做一啲唔想做嘅工作。」
提起父親即變敏感
Eason父親曾經說過，自己連坐牢都經歷過，實在沒有甚麼要懼怕，唯一擔心是連累到兒子的聲譽。但作為孝子的Eason對於父親的遭遇，心裏其實難過，他需要相當長的一段時間去接受這個事實，所以他不想有任何負面新聞傷害到父親，在訪問中話題只要觸及其父，他會變得很敏感。
「又問我爹哋啲嘢，我唔會答啦！𠵱家爹哋啲健康幾好，多謝關心啦！」Eason現時會定期探望父親，陪他說說話，做孩子不能待在老爹身邊，他對父親的健康狀況當然好擔心。
