全世界都話要環保，救救地球，唔少公司就借呢個名義大慳特慳，更甚係乘機發財，但亦有好多有良心嘅企業，積極參與環保工作，實行利人利己；英資集團太古地產係其中之一，早幾年已經加入呢個行列。
太古地產為咗鼓勵旗下屋苑住戶將廢物分類，除咗放置回收桶等設施，又重新設計同翻新每幢樓嘅斗式垃圾房，簡化回收過程，咁住戶自然樂意將家居廢物分類，鰂魚涌太古城係例子之一。
05年起，又畀清潔工人收集個人電腦同電視器材，然後轉賣畀政府註冊回收商，啲錢就入工人個袋當bonus。太古話，咁做可以令屋苑清潔服務合約價錢7年都維持不變，但服務水準就提升咗。係咪好橋呢？
75%廢物循環再用
另外，太古喺拆樓同起樓方面一樣講求環保，好似起緊嘅鰂魚涌巨無霸商廈港島東中心，拆卸嘅舊廢料，只係有1%要運去堆填區。
而嚟緊嘅西半山西摩道項目，已預早做定籌劃，估計可以令75%拆卸廢物循環再用。