鄭中基首次執導的賀歲片前晚舉行首映，女角楊愛瑾（Miki）心情勁high，偕曾傳緋聞的鄭中基睇戲再蒲吧，緊接換男伴轉蒲Volar穿梭蘭桂坊，惹來大批外籍人士借機親熱，嚇得她喊驚速逃。要玩又要驚，遊街又要避上鏡，Miki認真矛盾！
鄭中基首次執導的賀歲片《心想事成》前晚假尖沙嘴海運戲院舉行首映，一眾演員楊愛瑾、谷德昭、方力申、閻清、AmandaS.和蘇玉華等均有出席，其他撐場嘉賓有黎瑞恩、王馨平和林子萱，但鄭中基緋聞女友蔡卓妍未有露面，難怪他另一緋聞女友兼女角Miki，前晚可名正言順黐住夜蒲，心情比起男主角還要high。
阿Sa未有捧場
首映上，問鄭中基有否請蔡卓妍看首映？他說：「有請佢嚟，不過要嚟都嚟咗啦。」記者指阿Sa正身在北京拍戲，他聞言只「哦」了一聲，記者笑他：「你清楚過我哋啦。」聽罷他卻一味笑，又稱年三十晚會再約經理人黃柏高和肥谷看午夜場睇反應。至於方力申被問到曾否見過阿Sa探班，他口窒窒說：「有我戲分嘅就冇見過。」
穿梭鬧市狂歡
至首映完結，眾星轉往告士打道的上樓吧狂歡，鄭中基和Miki蒲足三粒鐘後，後者先行離開，又故意在大批記者前和三名男伴前後腳上保母車，到達中環後三男先行下車，她則在德忌笠街落車，Miki向記者說：「我約咗朋友咋。」原來三男已在Volar門口等候，她會合後即內進，逗留約半小時又離開，但她穿梭蘭桂坊街頭時，令大批外籍男士感到好奇，不停追住她影相，借故親熱，嚇得Miki大叫：「好驚呀！」
其後Miki與約夜蒲的其中兩男先後上車，抵鵝頸橋一帶時，她和男伴再分別轉坐的士，遊完一大輪車河，玩到化妝溶掉的Miki才與女助手到甜品屋食糖水，但她前門入後門出，認真此地無銀。
採訪、攝影：娛樂突發組、何永寧、仇志德
