利嘉兒同吳家樂，一個有老公，一個有老婆，兩個人除了個名都有個嘉及家字，同埋係同事之外，真係可以話係無咩關係，兩個人相約一齊開飯，莫非佢哋……非也！實情是兩個人一齊拍攝逢星期六晚八點播出嘅賀年節目《新春豬事町》而混熟，今日約埋一齊食餐鮑宴，順便跟師傅學揀鮑魚同江瑤柱。
記者：梁學文 攝影：譚盈傑
見到嘉兒同家樂，兩人即刻急不及待問今日食乜嘢？我就話梗係要食鮑魚同魚翅啦！佢兩個嘩嘩聲之餘，仲行得快過我呀！去到文華酒店，已見到主廚黃師傅，佢話：「煮鮑魚最重要是懂得揀材料，揀鮑魚同江瑤柱一定要日本貨、魚翅就要金山勾翅。此外，菜名同賣相一樣重要，今年文華嘅賀年菜就改咗好意頭嘅名，好似金磚滿屋咁。而我亦好注重菜式嘅賣相，上碟之前我會擺得靚靚，令大家睇到已經流口水。」講到賣相，不得不提有鮑魚有花膠的代代平安，黃師傅話這個菜的靈感來自日本菜，所以特別用日式的腐皮做袋，袋住其他材料，賣相比一般鮑魚花膠特別。
代代平安$528
代代平安其實是腐皮包着鮑魚、花膠和蠔豉，一人一袋不用爭。用腐皮做袋，一來賣相夠特別，二來可以多吸一點鮑汁，入口的時候味道更濃。味道方面，最好味都是鮑魚，燜足幾個鐘夠晒入味。
金磚滿屋$188
乳豬燒到脆卜卜，再灑上金箔，金光閃閃。雖然食金箔感覺好似食金屬落肚，不過用來做裝飾，又確實令燒乳豬變得更有新年氣氛，食過會不會金磚滿屋就不知道，不過金豬滿肚就一定會。
創業鴻圖$538
用金山勾翅、雪耳、青蟹和膏蟹做，湯底清甜重雞味。師傅話想個湯清淡些少，所以只用雞、豬骨和火腿燉，令湯底清澈。用燉湯的方法做，令翅的味道更鮮甜。
龍馬精神$688
顧名思義龍馬精神就是龍蝦炒球，用香脆的脆籃裝住。籃入面仲有哈密瓜作伴碟，就好似一粒粒龍珠，原隻龍蝦就似猛龍爭珠，好有氣勢，吃完包保全年都氣勢逼人。
日本鮑最靚
煮鮑魚呢類亁貨最緊要識揀，黃師傅話：「無論幾多個頭，鮑魚最靚梗係日本鮑，但價錢就貴啲！」利嘉兒儍問師傅：「成日聽人講幾多個頭，其實鮑魚係咪有好多個頭？」，答：「幾多個頭！其實講緊1斤鮑魚有幾多隻，比如話15頭，就係曬鮑魚嗰陣，大約要15隻1斤，頭數越大，鮑魚就越細隻。」
瑤柱要大隻身要黃
鮑魚要大隻，江瑤柱都一樣要大！家樂未等師傅答就搶住話：「我都知江瑤柱要揀大隻啲，仲要色澤夠金黃，最好冇黑點，就可以稱得上係好瑤柱。我點知？哈哈，因為細個成日偷阿媽啲江瑤柱食，一條條撕出嚟嗒，好好味。」，真為食！
睇路搵食
文華廳（25220111）
地址：中環干諾道中5號
座位：約70個
營業時間：12nn-3pm、6pm-11pm