我嘅豬年願望係：「我要寫好呢個blog。」（我知呢個gag已經好爛，講埋呢次啦。）
年尾好多人大掃除，我住條村有好多外國人，我見到有個外國女人，攞住束燃點緊嘅草，喺屋企掃嚟掃去。佢用唔鹹唔淡嘅廣話講：「呢啲叫鼠尾草，係鬼佬『look』柚葉（碌柚葉）。」
老友阿Man講，佢間水晶舖頭SiniShop都有鼠尾草賣，每束20蚊至90蚊。佢話鼠尾草係印第安部落嘅草本植物，據講靈性好高，能淨化空間嘅磁場，希臘人仲當佢係神奇草藥。外國尤其歐洲人喺聖誕、感恩、萬聖同新年等節日，點着鼠尾草煙熏間屋，就好似中國人用碌柚葉洗屋沖涼咁，去晒啲衰氣（負能量）。好多居港嘅外國人都買呢啲鼠尾草。不過，佢提醒孕婦就唔啱用㗎。
我同媽咪講，年卅晚唔用碌柚葉沖涼、改用鼠尾草。佢即刻話：「你係咪唔想過年？」
逢周一至周四刊出