美國雖然標榜就業平等，但年齡歧視問題依然普遍。網民Sherm喺《MSNBC》討論區呻，50歲以上嘅美國人搵工好難，就算有好多工作經驗，都唔易有老闆聘用，「我今年50幾歲，多年來不斷上網搵工，但仲係失業。」
40幾歲嘅Jeepers亦試過中年人搵工嘅苦況，「美國係一個由年輕人主導嘅社會，唔怪得好多中年人做『抽脂』或者『肉毒桿菌』整容，仲猛咁keepfit，唔係點同啲後生仔女搶工做。」
ShepK講：「我喺軍方退役時已經40幾歲，之後一直冇人請。不過，聽講有啲中年失業人士轉為喺屋企返工，例如做網絡市場推廣、諮詢、園藝、家居清潔等工作，雖然搵錢冇以前咁多，但都做得好開心。」
wireman-k話：「我寄咗好多求職信，但一直石沉大海，可能係公司一見我成50幾歲，就將封信掉落垃圾桶。」greys423教路：「寫求職信時最好唔寫年齡，因為公司知道你年紀咁大，會覺得你做唔到嘢。」
老有老嘅好
LizzyLeigh就反駁：「年齡未必係搵工嘅障礙，因為𠵱家好多公司採用電腦軟件去篩選求職信，如果求職信缺乏某些特定字眼，封信就會被丟棄；就算入選，公司亦冇時間睇晒所有信件，可能隨便揀封信出嚟面試就算。」佢認為識得人多，自然容易搵工。
Bronco60好開心咁講：「我58歲時申請𠵱家呢份工，即時獲聘用，可能因為管理層同我咁上下年紀。老闆話，有啲後生仔鍾意紋身，着埋晒啲古靈精怪嘅衫，講嘢時又經常用詞不當，而且冇乜責任感，所以公司唔會請佢哋。」