賣樓最怕遇着麻煩客，多多要求但又唔肯畀多啲定金做保證，業主如果一時心軟答應要求，可能隨時一身蟻。《香港討論區》嘅網友ayr26755就遇到人生交叉點：「今日簽臨時買賣合約，但係個買家要求喺落大定之後，畀佢入屋裝修，我想快啲賣出層樓，但係又覺得好危險，個代理話買家諗住做九成樓按，所以加定金係唔可能。」
ayr26755諗住畀條鑰匙代理，等佢同買家入去度吓呎，同喺完成買賣之前一個星期，畀佢入去油油，點知網友一面倒大嗌唔好，tommythumb話：「有風險喎！如果裝修期間有乜事，你都有責任！如果裝修咗一半，因某啲原因而唔可以完成交易，咁係咪你同佢畀裝修費先？我就唔會畀買家提早裝修，佢要度呎就得，不過唔可以施工！」
裝修出事 恐變凶宅
F355同fwho嘅意見仲驚嚇，佢哋話如果裝修期間發生意外，間屋隨時變凶宅。Fwho就話：「除非你覺得好好價，如果唔係無必要咁做。」
tommythumb補充，根據法律，簽完臨時合約之後，只需要畀佢入兩次屋，就係銀行要嚟睇樓估價，同完成買賣前驗樓，「度位唔係必須，不過賣家無所謂嘅，又或者唔怕風險，畀佢提早搬入去住都得！」
不過，為免不必要糾紛同保障自己利益，一句講晒，都係收晒錢兼完成所有買賣程序至好畀匙，唔係樓又賣唔成，重要孭上法律責任就唔抵啦！