去年10月開始農業股紛紛展開大升浪，其間升幅最大要數浩倫農科（1073），累積升幅超過3倍，另世紀陽光（8276）、中國林大（910）、第一拖拉機（038）等升幅都超過1倍，最近連天業節水（8280）都有資金炒落後，過去1個月升幅超過50%。農業股中似乎得隻玖源集團（8042）未郁過，近幾日開始有資金追捧，但由10月計落仲係原地踏步。
玖源同中化化肥（297）及海油化學（3983）一樣主要生產化肥，不同之處是主力生產BB肥，所謂BB肥，英文係BulkBlended，可以因應不同土壤及農作用製作相應的複合混肥，避免單一施肥造成的污染，而農作物卻不能增收。近年集團為增加收入來源，增設尿素生產線。
去年10月玖源收購位於美國生產合成氨及尿素的二手化工處理設備、廠房及零件資產，總代價3590萬美元，部份代價以附屬公司股份支付，意味間接引入美資股東，有利提升集團整體生產技術。此外，公司較早前宣布四川達州市的技術提升及建設項目已經動工，預期全部工程完成後產能可倍增。
攞業績計計數，玖源估值亦係偏低，集團06年上半年盈利2824萬元，上升12%，下半年為化肥業旺季，估計全年盈利可達5800萬元以上，現價0.70元，現年度PE不足6倍，在新收購及新產能提供貢獻後，07年度PE更低。農業股炒高後，唔易搵到另一隻好似玖源咁抵買嘅股票。
炒肥料股揀埋中化
肥料股另一個概念，係潮流興用玉米搞乙醇替代能源，搞到全世界（尤其係北美）農民都轉行種玉米，由於種呢樣植物所用肥料較多，化肥需求自然大增。北美肥料生產商Potash股價去年年中至今升了一倍，好大程度就係呢方面受惠，Potash先前入股中化化肥，肥料股可買埋呢隻。