四叔李兆基，因兩年勁賺500億元而被譽為「香港股神」，原來賭王何鴻燊亦都唔弱，喺港股大牛市中，大有斬獲。
佢前日出席香港大學組隊參加馬拉松活動後，同華華講起就快被納入恒指成份股嘅中國人壽同工商銀行，以及已經入咗藍籌成份股嘅建設銀行，佢話呢幾隻股佢統統都有，係透過IPO認購番嚟，不過佢話現時「仲未計數」，總之就「賺咗唔少」。
睇番賭王所持組合，其實同四叔都唔差得幾遠，不過持股量未必夠四叔多，之但係，如果賭王真係揸住嗰幾隻股到𠵱家都冇放，單係國壽已經好和味。不過如果同葡京比，呢啲股票所賺嘅都係濕濕碎啫。