年輕人鍾意Nike呢個品牌唔出奇，但近期連股民都逐漸愛上Nike，不過唔係鍾意Nike嗰幾個英文字母，而係佢嘅標誌──「一個大剔」。
散戶望低位勁抽升
點解？其實講緊嘅係恒指即日走勢，散戶都希望港股出現好勁嘅倒升，好似Nike嗰「大剔」咁，覺得比平時見到嘅V型反彈（俗稱「deepV」反彈），仲更加開心。喺《香港討論區》，唔少網友都話deepV反彈已經好吸引，但如果見到好似「大剔」咁嘅反彈，就更加完美嘞。
網友小飛俠2005話：「見到恒指出現deepV，梗係開心啦，可以挾淡友之餘，仲可以趁低位掃貨。」HDSI表示絕對同意，「如果股市都出現好似Nike嗰『大剔』咁，趁低吸納嘅散戶咪發達囉，好似啱啱過去嘅星期四，恒指上下波幅接近450點，單日應該賺唔少，不過淡友就慘啲嘞。」
chiling2話deepV唔止好誘人，仲幾乎「殺死」好多人──特別係淡友；而網友chakyin24更笑言：「deepV都未夠正，好似Nike咁大剔，就真係perfect。」
據炒股專家指出，若以圖表分析，Nike剔即係一支大陽燭，喺一般升市情況經常出現；至於deepV若以陰陽燭嚟表示，就係倒轉射擊之星，若喺大市低位出現，即係反映市況已經見底。不過由於只係一日圖，Nike剔可能由於裂口低開，相反deepV亦有可能係裂口高開，所以網友所講純粹得啖笑，都係無謂深究。