香港單位出名細，若想感覺好啲，惟有改做開放式，不過，airmax9394想知道開放式單位好唔好住？同埋可唔可以煮食？兩個人住夠唔夠？於是喺《香港討論區》公開求教。
有幾位網友話唔好，bbqbbq999狠批：「舊式公屋間隔咁，我就No啦！」PX330就教路，「唔大炒（餸）就OK，蒸吓、焗吓都可以。記得唔好用咁多布藝傢俬，否則吸咗味，好難散。」
MetroFrankie答得實際，「要睇吓你同女友/老婆嘅生活習慣同需要，如果一個鍾意靜靜地睇書，一個鍾意一日到黑開住電視，就認真唔好住……」
其他網友就正面好多，pkkit601以過來人身份話：「我住咗開放式單位4年，400幾呎，變到600幾呎咁，見使好多；一星期煮3次飯，只要抽油煙機開最大就無事；仲有我屋企嘅牆係白色，4年來住到𠵱家仍然一樣。」佢再補充話：「單位原來三尖八角，改咗開放式後，變咗大正方形，兩個人夠住有凸。」
另外，dT_Tbv同syyeung就分別指出，開放式單位似豪華酒店房，內櫳五臟俱全，地方睇落大啲，真係幾好住㗎。
估值較低影響上會
其實窮則變，變則通，細單位改開放式，只要住得舒服，不失為好方法，但要提醒大家兩點，很多200至300平方呎，原圖則為開放式嘅單位，又或服務式住宅，並無提供洗衣機，住戶須自行光顧洗衣店。
此外，樓齡逾20年物業，銀行或會上門視察環境後才提供估價，如發現改裝開放式，會影響單位估值，若因此而估唔到價，買家上會要額外補差價。