上禮拜五花旗嗰邊走勢偏淡，今日港股開市可能會有壓力，大笨象滙控（005）仲會係淡友造低個市嘅籌碼，不過，股價技術上靠穩，應該唔會跌好多。
短炒盤最有可能係昅實兩隻恒指新貴工行（1398）同國壽（2628），兩股走勢都唔錯，尤其工行，今日應該有睇頭，如果升得有勁，有大成交支持股價上，有望帶起國企股。
恒指服務公司話會加多啲成份股，最多去到50隻，好自然股民又會玩尋寶，邊啲係熱門股已經俾傳媒列晒出嚟，工行同國壽如果升得好好睇睇，啲「準恒指成份股」好容易又會俾人炒高。
喺加入新丁之後，連埋比重調節嘅限制，滙控嘅比重跌到得20%，中移動（941）向下調節嘅比重最大，估計喺換馬行動嘅過程，兩隻股份都會有啲壓力。
過埋呢個禮拜就放年假，過完年返嚟個市會點，仲有好多變數，因為港股休假，花旗同㗎仔個市都繼續開。啲油價升到阻力位，爭持都幾激烈，金價就突破技術位，仲會有上升空間，如果睇唔通個市，都可以吼吓金屬股。
平保C輪7523：平保（2318）過去1個月一直被10日同20日線壓住，即使A股上市打鑼打鼓，都冇乜勢，上禮拜三突然炒上，禮拜五「造旗」，形態靚番好多，報收38.20元，應可升破40.50元推向45元。平保C輪7523上日報收59仙，槓桿率6.5倍（有效3.9倍），對沖值0.59，正股升上40.50元，7523應該唔會低過73仙，正股升上45元，隻輪應該喺1元樓上，正股跌穿36.80元止蝕。