還記得數月前，見識過法國的國際風箏節，佢哋嘅風箏鼓鼓囊囊的很可愛，滿天手腳FingFing的貓、企鵝、巨型蜥蜴……好似動物襲地球咁好壯觀搞笑。我都想學整隻有香港色彩的立體豬兜風箏，等我農曆新年行大運行到東龍島，露宿一宵，睇完第一線晨光，然後送舊迎新送狗迎豬，狗年嘅霉氣怨氣，擺晒喺隻豬仔入面，再放晒上天，如果個天眷顧我的話，話唔埋同佢交換咗啲福氣財氣收番落嚟，唔使再捱騾仔囉！
記者︰劉昱蘭
攝影︰陳陶鈞
Model︰Candy、Kay（IntermediaGroup）鳴謝︰綠趣坊
立體肥豬飛得起
細個時望住無際晴空，睇見所有飛翔物，都會問點解佢識飛而我唔得呢？其實到𠵱家都仲覺得風箏好有趣，唔似飛機咁要靠機械動力飛行，重過空氣但又飛得起。唔同形狀嘅風箏，都要計過度過，先至可以單靠風力飛行。例如立體風箏咁，係靠風箱排風的原理，你見個豬仔風箏4面的長方形膠面，會剪去中段，而且係穿空設計，即無上蓋和下底，目的係增加受風面，俾氣流穿過風箱去穩定隻風箏，同時靠風箱發散受風後多餘能量。
要佢成功起飛，就要識揀位，因為放風箏有分「上風」同「下風」兩個方位。風係由上風吹向下風位，如海風由海皮吹向內陸的話，海皮就叫做上風，入啲嘅陸上位置就叫下風。有啲數米長的巨型風箏，需要幾個人助跑起飛，就要企下風位向上風跑。一般小型風箏，好似隻肥豬咁，企喺上風位一拋就可以喇。
立體豬一放衝天
其實要整隻立體風箏，步驟唔多，但要好花心機同時間︰
要有8支竹做個骨架，度到每支個長度要啱啱好，再削尖佢同整榫口位，都已經大半日，再將剪好的膠面套上去，整好個長方體Body。
DIY六角日本風箏
立體風箏流行於歐美，外國人當放風箏係結合藝術同埋娛樂的體育運動，無奇不有創意無限。而睇番風箏的發源地，其實喺2,500年前的中國，楚漢相爭靠佢通風報信，或者用嚟探測高空氣溫同閃電，後來傳到日本，日本人將佢演變成Rokkaku，六角形平面有多啲位，喺上面畫吓日本特色武士、面譜，寫吓字向上天祈福。
點樣DIY
東龍洲露營熱點
東龍洲係熱門露營點之一，因為交通方便又多嘢睇，喺鯉魚門搭半個鐘街渡就到，島上山路平坦，仲有個剛完工的小型博物館，介紹島上古蹟，最啱一家大細嚟玩，小朋友學到嘢，大人又可以Relax吓，有幾個位個感覺仲好有異國風情，而且每個景點都好集中，唔使行得太辛苦，享受大自然身心都可以舒緩。
露營自由煮意
玩到好攰又餓，最啱玩埋戶外煮嘢食，成個草地都係你個廚房，煮啲食物好似有天然香草味咁。今次跟團去，連煮食用品同食物同營都有人準備埋，唔使自己拎，簡單裝備就享受露營樂趣，爽！
報團資料
綠趣坊——風箏DIY露營團（2日1夜）
活動︰風箏簡介、紮作日本風箏、欣賞日出、參觀炮台遺蹟、紮營、煮食
地點︰東龍洲
查詢電話︰64469496
網址︰ http://naturefun.net
團費︰$198（12歲以下）/$238（12歲或以上）
註︰收費不包括來回船票$25/人，另可額外購買旅遊保險$20/人。15人起可自組成團，並有團體優惠