另一邊廂，美少女廚神JJ就變身「易007」「幫」女郎，帶你入到元朗揀年花。小妮子原來都是愛花之人，全因小時候家裏的花園種了很多花。之不過說到要揀年花，還是交由農場師傅過兩招！
記者：郭佩韻
攝影：陳偉強、伍慶泉
服裝提供：上海灘
萬元桃花有買家
全球氣溫上升，近日本港天氣更是持續20度以上，令不少人擔心年花過早盛開，無法應節。美少女廚神JJ就同大家入到位於元朗的農場，搜集資料看看今年邊款年花開得最合時。財利農場場主馮先生就說，「今年雙春兼閏月，冬季上半期較寒，後期就趨向回暖，之前年花開都唔開，但近幾日就慢慢開花，正好趕到在過年時開齊。」眼見馮先生的農場，有超過百多棵桃花，當中更有一棵奇高，幾乎有三個JJ咁高大，咁呢棵值幾錢？馮先生就話：「幾萬銀啦，有人訂咗喇！其實今季桃花開得好靚，產量比去年多，價錢比上年貴一成，由$600至數萬元不等。」不過，場內至少有50棵桃花已被訂購，想趕住行豬年桃花運的就要快手。
今年年桔$200起
買年桔已經是過年的指定動作，但究竟點揀先至可以揀得意頭好，而不會買了霉桔返屋企？馮先生就說，「年桔最緊要係睇果實平不平均，如果生得稀疏，果皮摸上手唔光滑，枝葉唔翠綠，就不宜購買。」場地有多種傳統年桔，如四季桔、金桔、朱砂桔等，價錢又有何不同？「其實年桔價錢不是按品種而定，只是按其大細，$200至$2,000盆都有，視乎不同客人的需要。」JJ一見到年桔，就即刻想摘下來吃，馮先生說：「咪住！最起碼要擺到過年後，大約3月先摘得㗎！」
菊花牡丹齊爭艷
買年花最緊要睇盆花開了幾多成，馮先生說：「如果想等過年先開齊，買時就要揀花只開了一半的那些；如果怕花不開，平日就要下點工夫，施肥及淋水要定時。」來農場揀年花最大好處是可議價，JJ最愛玫瑰但講講吓價最後抬走棵桃花！
花墟專家教揀花
如果無時間行農場，不妨到旺角花墟走一趟，一樣買到靚貨！在旺角花墟有三間花舖的賴榮春先生本是醫生，轉行做園藝設計後對盆栽種植甚有心得。賴先生指買年花最緊要是意頭，「買年桔就可以搖一搖樹幹，如果有桔仔跌下，即是說太過熟，好快爛；如果見到盆桔出青桔，則不宜選購。至於買五代同堂，個果有黑點就不應買，一定是下下貨。」
室內花市買花易
想看看年花新品種，今年將軍澳東港城就搞咗個個新春花展會，有五個主題花卉展示區，包括蘭花、牡丹、水仙、梅菊竹及百花。睇完年花，更可以在室內年宵攤位辦年貨，有數十個富中國色彩的賀年食品及擺設檔位，絕對可以消磨一整天時間。
Plus！摩登年貨
賀年食品多不勝數，今年你又買咗全盒未？崇光百貨七樓正做緊賀年貨八折大減價，快啲去掃番啲摩登全盒啦！此外，今年是豬年，當然不少得豬年行運擺設，想在豬年行個大運？一於買隻豬豬返屋企！
（a）財利農場（24882485）
（b）山城花藝（27873372）
（c）東港城新春花展會（26287399）
（d）崇光百貨（28338338）
（e）KingandCountry（25258603）
（f）琉璃工房（29189115）
（g）大班麵包西餅（23513222）